युक्रेनको ओडेसामा भएको रूसी क्षेप्यास्त्र आक्रमणप्रति संयुक्त राष्ट्रसङ्घद्वारा निन्दा

युक्रेन । शनिबार दक्षिणी युक्रेनको ओडेसा शहरमा भएको रूसी क्षेप्यास्त्र आक्रमणको संयुक्त राष्ट्रसङ्घले निन्दा गरेको छ । युक्रेनको १९ औँ शताब्दिमा बनेको ऐतिहासिक महत्वको भवनमा क्षति पुगेको र कम्तीमा सात जना घाइते भएको घटनाको राष्ट्रसङ्घ निन्दा गरेको हो ।

१९ औं शताब्दीका भवनहरूको सुरम्य सडकहरूको लागि परिचित ‘ब्ल्याक सी’ बन्दरगाहमा पटकपटक रूसी आक्रमणहरू लक्षित हुनेगरेका छन् ।

संयुक्त राष्ट्रसङ्घीय निकाय (युनेस्कोले) भनेको छ, “युनेस्को विश्व सम्पदा सूचीमा सूचीकृत ओडेसाको ऐतिहासिक केन्द्रमा गएराति भएको क्षेप्यास्त्र आक्रमणबाट कम्तीमा दुई सांस्कृतिक भवनमा गम्भीर क्षति पुगेको छ ।”

“हाम्रो टोली क्षतिको तत्काल कागजातमा सहयोग गर्न र युक्रेनी अधिकारीहरूसँग आवश्यक आपतकालीन हस्तक्षेपहरूको पहिचान गर्न प्रतिवद्ध छ। छिट्टै ओडेसामा युनेस्कोको एक मिशन तैनाथ गरिनेछ।

युक्रेनका क्षेत्रीय गभर्नर ओलेग किपरले घटनाको पुष्टि र विरोध गर्दै सामाजिक सञ्जालमा लेखेका छन्, “ओडेसाको ऐतिहासिक केन्द्रमा रुसी आतङ्ककारीले गरेको आक्रमण भएको छ । आक्रमणका क्रममा सात सवसाधारण घाइते भएका छन् । युक्रेन यसको कडा शब्दमा निन्दा गर्छ।”

किपरले यसअघिका पोस्टमा दुई महिला र एक बच्चा घाइते भएको बताएका थिए ।

युक्रेनका राष्ट्रपति भोलोदिमिर जेलेन्स्कीले रूसी सेनाले जानाजानी गरेको आक्रमणको निन्दा गर्दै कुनै पनि व्यक्तिको मृत्यु नहुनु भाग्यको कुरा भएको बताएका छन् ।

किपरले शहरको ऐतिहासिक होटल ब्रिस्टलबाहिर एक महिलालाई स्ट्रेचरमा राखेर उद्धारकर्मीले चलाएको तस्बिर सार्वजनिक गरेका छन् । तस्बिरमा १९ औं शताब्दीको होटलको अलंकृत अग्रभाग र भित्री भागमा क्षति पुगेको देखिन्छ।

युक्रेनको आपतकालिन सेवाले ब्रिस्टल बाहिर सडकमा भग्नावशेषको थुप्रो र लुगामा धुलो लागेकी एक महिलालाई उद्धारकर्ताले सहयोग गरिरहेको भिडियो सार्वजनिक गरेको छ ।

अग्निनियन्त्रकहरूले एउटा कोठामा फसेकी एक महिलालाई उद्धार गरी छतमा लागेको आगो निभाएको बताइएको छ।

राष्ट्रपति जेलेन्स्कीले भने, “आक्रमणको केन्द्रबिन्दुमा रहेका व्यक्तिहरूमा नर्वेका कूटनीतिक प्रतिनिधिहरू पनि थिए।”

“युनेस्कोद्वारा संरक्षित क्षेत्रमा धेरै क्षति र विनाश भएको छ,” ओडेसाका नगरप्र्रमुख गेन्नाडी ट्रुखानोभले भने । ओडेसाको ऐतिहासिक केन्द्र युनेस्कोको विश्व सम्पदा सूचीमा पर्छ ।

तत्कालीन सोभियत सङ्घद्वारा ध्वस्त पारिएको संरचनालाई सन् २००० को दशकमा पुनर्निर्माण गरिएको थियो भने यसमा सन् २०२३ जुलाईमा रूसी आक्रमणबाट नराम्ररी क्षति भएको थियो।

किपरले भने, “विस्फोटका कारण साहित्यिक, ऐतिहासिक र स्थानीय विद्या, पुरातात्विक सङ्ग्रहालय, पश्चिमी र पूर्वी कला सङ्ग्रहालय र फिलहारमोनिक सहित धेरै ऐतिहासिक स्मारकहरूको झ्यालहरू भत्किएका छन् र उनीहरूको अगाडीपट्टिको भागमा क्षति पुगेको छ।”

युक्रेनी सञ्चार माध्यमले होटल नजिकै ठूलो खाल्डो परेको, भवन चिरिएको, र झ्याल फुटेको र भित्रको भुइँमा फोहर थुप्रिएको तस्बिर सार्वजनिक गरेका छन् ।

रूसी सैन्य ब्लगरहरूले उक्त होटलमा विदेशी सैन्य विशेषज्ञहरू बसेको दावी गरेका छन्।