अमेरिकामा विमान र हेलिकप्टर ठोक्किएर दुर्घटना भएको स्थानमा १८ शव फेला
बीबीसी । वाशिङ्टन डीसीस्थित रोनल्ड रेगन विमानस्थलमा अवतरण गर्ने तयारीमा रहेको एउटा यात्रुवाहक विमान सेनाको हेलिकप्टरसँग आकाशमा ठोक्किएको अमेरिकाको सङ्घीय नागरिक उड्डयन निकाय (एफएए)ले जनाएको छ ।
बुधबार बेलुकी ९ बजेतिर हावामा हेलिकप्टरसँग ठोक्किएपछि अमेरिकन एयरलाइन्सको उक्त विमान वाशिड्टन डीसीमा बग्ने पोटोम्याक नदीमा खसेको थियो । चालकदलका चार र ६० जना यात्रु रहेका उक्त विमान क्यान्सास राज्यको विचिटाबाट प्रस्थान गरेको थियो ।
विमान खसेको ठाउँमा खोजी र उद्धार अभियान सुरु भएको छ । सरकारी निकायहरूले उक्त दुर्घटनामा कति जना हताहत भए भन्ने औपचारिक जानकारी दिइसकेका छैनन् । तर प्रहरी स्रोतले विमान खसेको स्थानमा १८ वटा शव फेला परेको जनाएको छ ।
अमेरिकी अधिकारीहरूले घटनाको अनुसन्धान गरिरहेका छन् । उक्त हेलिकप्टर तालिममा प्रयोग गरिएको अमेरिकी सेनाले पुष्टि गरेको छ ।
अमेरिकी सञ्चारमाध्यमका अनुसार दुर्घटनाग्रस्त विमान दुई टुक्रा भएको छ भने डुङ्गा र गोताखोरहरूले विमान र हेलिकप्टरमा सवार मानिसहरूको खोजी गरिरहेका छन् । दुर्घटनाग्रस्त हेलिकप्टर पानीमा उत्तानो परेर खसेको सञ्चारमाध्यमहरूले जनाएका छन् ।
