इजरायलले अब गाजावासीलाई आफ्नो घर फर्किन दिने
बीबीसी । इजरायलका प्रधानमन्त्री बेन्जमिन नेतन्याहूले हमासले यो साता थप ६ जना इजरायली बन्धक मुक्त गर्ने तथा इजरायलले गाजावासीलाई सोमबारदेखि आफ्नो घर रहेको उत्तरी क्षेत्रमा फर्कन दिने बताएका छन् ।
मुक्त हुने भनिएका बन्धकहरूमा इजरायल र हमासबीच विवादको केन्द्रमा रहेकी इजरायली नागरिक अर्बेल यहुद पनि छिन् । उनको विषयलाई लिएर दुई पक्षबीच मतभिन्नता देखिएपछि इजरायलले गाजावासीलाई उत्तरतर्फ जानबाट रोकिरहेको छ ।
हमासले शनिबार चार इजरायली सैनिकलाई मुक्त गरेको थियो तर उसले यहुदलाई मुक्त गरेको थिएन । इजरायलले हमासमाथि युद्धविराम सम्झौताको उल्लङ्घन गरेको आरोप लगाएको छ । उक्त सम्झौताअन्तर्गत प्यालेस्टिनी बन्दीलाई रिहा गरेको बदलामा इजरायली नागरिकलाई पहिले मुक्त गर्नुपर्ने थियो ।
युद्धविराम सम्झौता लागु भएपछि हमासको कब्जाबाट सात जना इजरायली बन्धक र इजरायली जेलबाट २०० जनाभन्दा बढी प्यालेस्टिनी बन्दीहरू मुक्त भएका छन् ।
उत्तरी गाजामा पुग्ने प्रयास गरिरहेका हजारौँ विस्थापित प्यालेस्टिनीहरूलाई दुई दिनदेखि हिँडिरहेको बाटोमा सैन्य अवरोध गरिएपछि उनीहरू अगाडि बढ्न पाइरहेका छैनन् ।
युद्धविराम र बन्धक तथा बन्दीहरूलाई छाड्ने सम्झौता यही जनवरी १९ मा लागु भएको थियो । त्यसयता दुवै तर्फबाट दुई पटक बन्धक तथा बन्दीहरू मुक्त गरेर आदानप्रदान गर्ने कार्य भएका छन्।
