समर्थकहरुको विरोधपछि दक्षिण कोरियामा निलम्बित राष्ट्रपतिलाई पक्राउ गर्ने प्रयास स्थगित

बीबीसी । अख्तियारको दुरुपयोग गरेको विषयमा अनुसन्धान गर्ने दक्षिण कोरियाली निकायका अनुसन्धानकर्ताहरूले महाभियोग लागेर निलम्बनमा परेका राष्ट्रपति यून सुक यउललाई नियन्त्रणमा लिने प्रयासलाई स्थगित गरेका छन् ।

विज्ञप्तिमा अनुसन्धानकर्ताहरूले ‘निरन्तरको गतिरोधका कारण उनलाई पक्राउ गर्न व्यावहारिक रूपमा असम्भव देखिएको’ बताएका हुन् । ‘हामी कार्यस्थलमा रहेका हाम्रो टोलीको सुरक्षाबारे संवेदनशील छौँ। हामीले आरोप लागेका व्यक्तिले कानुनी प्रक्रियालाई अस्वीकार गर्ने प्रवृत्ति देखाएको पाएका छौँ…। उक्त कार्य व्यापक रूपमा निन्दनीय छ,’ वक्तव्यमा भनिएको छ ।

यउललाई पक्राउ गर्न के गर्ने भन्ने विषयमा पुनः एक पटक छलफल गरेर मात्र तय गरिने उनीहरूले जनाएका छन् ।

अनुसन्धानकर्ताहरूले निलम्बित राष्ट्रपति यउललाई पक्राउ गर्ने कार्यलाई स्थगित गरेपछि उनको निवासअगाडि जम्मा भएका समर्थकहरूले चाहिँ ‘हामीले जित्यौँ’ भन्दै नारा लगाएका छन् । उनलाई पक्राउ गर्न खोज्दा शुक्रबार बिहानैदेखि नाटकीय घटनाहरू भएका थिए ।

यउललाई पक्राउ गर्नका लागि उनको घरमा पुगेका प्रहरी अधिकारीहरूले उक्त स्थान छाडेका छन् । डिसेम्बर महिनाको सुरुमा छोटो अवधिका लागि कायम रहेको ’मार्शल ल’ लागु गरेको आरोपमा उनलाई पक्राउ गर्न खोजिएको हो ।

स्थानीय समयअनुसार बिहान ८ बजे सुरुमा २० जना प्रहरी अधिकारीहरू यउलको घरतर्फ गएका थिए । तर पछि उक्त सङ्ख्या बढाएर ८० पुर्याइएको थियो । यउलका वकिलहरूले उनीविरुद्ध जारी भएको पक्राउपुर्जीलाई ‘कानुनविपरीत’ भन्दै त्यसलाई चुनौती दिने बताउँदै आएका छन् । यउलको सुरक्षा दिने फौजले पनि उनलाई पक्राउ गर्नबाट रोकेको थियो ।

यसै साताको सुरुमा सोलस्थित एक अदालतले यउलविरुद्ध पक्राउपुर्जी जारी गरेको थियो । उनले डिसेम्बर ३ मा देशमा मार्शल ल लागु गर्ने प्रयास गरेका थिए। सोही आरोपमा उनीविरुद्ध पक्राउ पुर्जी जारी भएको हो ।

उनीमाथि देशद्रोहसहितका आरोपहरूमा अनुसन्धान भइरहेको छ । त्यसक्रममा उनलाई अदालतले सोधपुछका लागि तीन पटक बोलाइसकेको छ । तर उनले त्यसको अवज्ञा गर्दै अदालतमा उपस्थित नभएपछि उनीविरुद्ध पक्राउ पुर्जी जारी भएको हो ।