रूसले युक्रेनलाई ‘परीक्षण स्थल’ का रूपमा प्रयोग गरेको जेलेन्स्कीको भनाइ
किएभ । रूसले युक्रेनमा सशस्त्र अन्तरमहादेशीय ब्यालेस्टिक क्षेप्यास्त्र प्रहार गरेको आरोप युक्रेनी राष्ट्रपति भोलोदिमिर जेलेन्स्कीले लगाएका छन् ।
रूसी नेता भ्लादिमिर पुटिनले युक्रेनलाई हतियार परीक्षण स्थलका रूपमा प्रयोग गरिरहेको आरोप पनि जेलेन्स्कीले लगाए ।
यदि अन्तरमहादेशीय ब्यालेस्टिक क्षेप्यास्त्र प्रहार गरेको पुष्टि भयो भने इतिहासमा यस्तो हतियार लडाईँमा प्रयोग भएको पहिलो घटना हुनेछ र यसले युक्रेनमा युद्धको तीव्र वृद्धि हुनेछ ।
“गति, उचाईजस्ता सबैका लागि उत्कृष्ट विशेषता भएको अन्तरमहादेशीय ब्यालेस्टिक क्षेप्यास्त्रसँग रूसले हालै प्रयोग गरेको हतियारको क्षमता मिल्ने भएकाले यसको विज्ञहरूद्वारा अनुसन्धान चलिरहेको छ । यो स्पष्ट छ कि पुटिनले युक्रेनलाई परीक्षण स्थलको रूपमा प्रयोग गरिरहनुभएको छ,” जेलेन्स्कीले सामाजिक सञ्जालमा पोस्ट गरिएको एक भिडियोमा भनेका छन् ।
अन्तरमहाद्वीपीय ब्यालिस्टिक क्षेप्यास्त्रहरू आणविक हतियारहरू बोक्न बनाइएको हो र यसको न्यूनतम दायरा पाँच हजार ५०० किलोमिटर टाढासम्म मार हान्न सक्ने रहेको छ ।
स्रोत र विज्ञहरूले एएफपीलाई बताएअनुसार युक्रेनमा प्रहार गरिएको क्षेप्यास्त्र आणविक भएको आरोप नलगाइएको ‘स्पष्ट’ छ र यसले रूसले यसलाई मुख्यतया राजनीतिक प्रभावका लागि प्रक्षेपण गरेको सङ्केत गर्छ ।
जेलेन्स्कीले पुटिनले आफ्नो छिमेकीलाई आफ्नो पकडबाट भाग्नबाट रोक्नका लागि जे पनि गरेको आरोप लगाएका छन् ।
“आज, हाम्रो ‘पागल’ छिमेकीले फेरि एक पटक वास्तवमा उहाँ को हुनुहुन्छ र उहाँ कसरी सम्मान, स्वतन्त्रता र सामान्य रूपमा मानव जीवनलाई घृणा गर्नुहुन्छ भन्ने देखाएको छ । यसले उहाँ कति डराउनुभएको छ भन्ने पुष्टि हुन्छ,” जेलेन्स्कीले भने ।
