अब हमासले युद्ध अन्त्य नभएसम्म थप बन्धक रिहा नगर्ने
बीबीसी । हमासले सुरु गरेको आक्रमण पूर्ण रुपमा अन्त्य नहुँदासम्म बन्धक बनाइएका थप मानिसहरूलाई मुक्त नगर्ने जनाएको छ । हमासले वक्तव्य जारी गर्दै भनेको छ, ‘आक्रमण पूर्ण रुपमा अन्त्य नभएसम्म कैदीहरूबारे कुनै पनि छलफल वा साटफेरको सम्झौता नगर्ने प्यालेस्टाइनको राष्ट्रिय निर्णय भएको छ।’
हमासको वक्तव्यले इजरेली सरकारलाई अफ्ठ्यारोमा पारेको छ । इजरेलले बन्धकहरू मुक्त गर्ने सबैभन्दा उत्तम उपायको रुपमा सैन्य दबावलाई लिएको छ र उद्धारका लागि भन्दै सैन्य कारबाहीहरू अघि बढाएको छ । तर यो उपायले अहिलेसम्म उपलब्धि भने हासिल भएको छैन।
इजरायलले डिसेम्बरको सुरुमा गरिएको युद्धविराम अन्त्य भएयता गाजामा हमासका दुई हजार लडाकुहरू मारिएका बताएको छ। एक साता लामो युद्धविरामका क्रममा एकसय जनाभन्दा बढी बन्धक बनाइएका मानिसहरू मुक्त भएका थिए । गत अक्टोबर ७ मा हमासले इजरेलमा गरेको आक्रमण र घुसपैठका क्रममा अपहरणमा परेको भनिएका २४० जनामध्ये १२० जना अझै बन्धक रहेको ठानिएको छ ।
हमासबाट बन्धक बनाइएका भनिएका नेपालको कञ्चनपुरका विद्यार्थी विपिन जोशीको अवस्था अझैसम्म अज्ञात छ । यसअघि युद्धविरामका क्रममा थाइल्यान्ड, फिलिपिन्स सहितका केही विदेशी बन्धकलाई रिहा गरे पनि नेपालका नागरिक रिहा भएका छैनन् ।
सरकारले इजरेल–हमास युद्ध रोक्न मध्यस्थता गरिरहेका कतार, इजिप्टसहितका देशहरूमार्फत् जोशीको रिहाइका लागि पहल भइरहेको जनाएको छ । यसअघि हमासले तीन जना ज्येष्ठ उमेरका इजरायली बन्धकहरूको भिडियो सार्वजनिक गरेको थियो। तर जोशी कहाँ र कस्तो अवस्थामा छन् भन्ने अझैसम्म थाहा हुन सकेको छैन ।
अमेरिकाले भने राष्ट्रसङ्घको सुरक्षा परिषद्मा अघि सारिएको युद्धविरामसम्बन्धी प्रस्तावको मस्यौदामा आफ्नो गम्भीर चासो रहेको बताएको छ। सुरक्षा परिषद्मा यसअघिको मतदानमा अमेरिकाले भिटो प्रयोग गरेपछि युद्धविरामको प्रस्ताव पारित भएको थिएन ।
डिसेम्बरको सुरुमा भएको एक साता लामो युद्धविरामले संयुक्त राष्ट्रसङ्घले भोकमरी निम्तिन सक्ने चेतावनी दिएको गाजामा थप सहायता पठाउन सहयोग पुगेको थियो । अर्को युद्धविरामका लागि इजिप्टको काएरोमा वार्ताहरू भइरहेका छन्। यद्यपि प्रारम्भिक छलफलहरूबाट कुनै सहमति निस्कन सकेको छैन ।
