को हन् हमासले रिहा गरेका २४ बन्धक ?
हमासले १३ इजरायली ११ विदेशीसहित २४ बन्धकलाई मुक्त गरेपछि दुई पक्षबीच भएको सहमतिअनुसार इजरायलले ३९ जना प्यालेस्टिनी बन्दीहरूलाई रिहा गरेको छ ।
हमासले चार दिनभित्रमा जम्मा ५० जना बन्धक रिहा गर्ने बताइए पनि त्यसमा नेपालका विपिन जोशी पर्ने नपर्नेबारे कुनै विवरण आएको छैन । कतारले मध्यस्थता गरेको सहमतिपछि इजरायल र हमासबीच चारदिने युद्धविराम सुरु भएको छ ।
रिहा गरिएका प्यालेस्टिनीहरूमाथि हत्या प्रयास गरेको, ढुङ्गा हानेको जस्ता कैयौँ आरोपहरू लगाइएको थियो । तीमध्ये कतिपय दोषी ठहर भइसकेका थिए भने केहीविरुद्धको मुद्दा सुनुवाइकै क्रममा थियो । रिहा हुनेमा २४ जना महिला र १५ किशोरकिशोरी छन् । वेस्ट ब्याङ्कमा रिहा गरिएका उनीहरू आफ्नो घर फर्कन सक्ने इजरायली कारागारले जनाएको छ ।
रिहा भएका प्यालेस्टिनीहरू इजरायलले पक्राउ गरेका ३०० जना महिला र नाबालकहरूमध्येबाट इजरायल आफैँले छानेका मानिसहरू हुन् । रिहा हुने इजरायलीमा दुई वर्षदेखि ८५ वर्षसम्मका मानिस छन् । हमासले ती ८५ वर्षकी महिलालाई उनको गाउँबाटै अपहरण गरेको थियो । त्यस्तै ७८ वर्षकी क्यान्सरपीडित, ७९ वर्ष,७७ वर्ष र ७२ वर्षका वृद्धाहरू छन् ।
हमासले रिहा गरेका मानिसहरूमा दुई, चार र छ वर्षका बच्चाहरू र उनीहरूका आमा पनि छन् । इजरायल र हमासबीचको अस्थायी युद्धविरामअन्तर्गत चार दिनभित्रमा ५० जना बन्धक रिहा हुने जनाइएको छ ।
हमासका अनुसार त्यसको बदलामा इजरेली पक्षले उसको जेलबाट कुल १५० जना महिला र किशोर किशोरीहरू रिहा गर्ने छ । इजरायलले गजामा मानवीय सहायता, औषधि र इन्धन बोकेका सयौँ लरीहरूको प्रवेशलाई समेत अनुमति दिने सहमति जनाएको हमासले बताएको छ।
