गाजामा युद्धविरामको अवधि सुरु
इजरेल र हमासबीचको युद्धमा युद्धविरामको अवधि आरम्भ भएको छ । स्थानीय समयानुसार बिहान ७ बजे उक्त अस्थायी सङ्घर्षविराम सुरु भएपछि अपराह्ण ४ बजे हमासले बन्धक बनाएर राखेकाहरूमध्ये १३ जना मुक्त हुने कतारी मध्यस्थकर्ताहरूले बताएका छन् ।
युद्धविराम सुरु भएसँगै थप सहायता गाजा स्ट्रिपतिर जान थालेको र गाजामा प्यालेस्टिनी र अरू मानिसहरू हिँडडुल गर्न थालेको देखिएको छ । हमासले मुक्त गर्ने १३ जनालाई अन्तर्राष्ट्रिय रेडक्रसलाई हस्तान्तरण गरिने छ र उनीहरूलाई इजिप्टको रफाह नाका हुँदै इजरायल लगिने छ ।
इजरायल र हमासबीच भएको सहमतिअन्तर्गत चार दिनको युद्धविरामको अवधिमा हमासले गाजाबाट कुल ५० जना बन्धकहरूलाई मुक्त गर्ने छ भने इजरायलले १५० जना प्यालेस्टिनी बन्दीहरूलाई रिहा गर्ने छ ।
शुक्रबार मुक्त हुने भनिएकाहरू सबै जना महिला तथा बालबालिका हुने बताइएको छ। उनीहरूको नाम सार्वजनिक गरिएको छैन । गाजाबाट रफाह नाकामा इजरेली सुरक्षाकर्मीहरूले मुक्त भएका मानिसहरूको परिचय जाँच गर्ने छन्। त्यहाँ उनीहरूको स्वास्थ्य परीक्षण पनि हुने छ। त्यहाँबाट उनीहरूलाई हेलिकप्टरमा राखेर इजरायली सीमाभित्र लगिने छ ।
रिहा भएपछि उनीहरूलाई थप परीक्षणका लागि अस्पताल लगिने छ। त्यसपछि बल्ल उनीहरूको आफन्तसँग पुनर्मिलन हुने छ । त्यसको दुई घण्टाजतिपछि मात्र इजरायली जेलबाट प्यालेस्टिनी बन्दीहरूलाई रिहा गरिने छ ।