उत्तर कोरियाले छिट्टै जासुसी भूउपग्रह प्रक्षेपण गर्ने
उत्तर कोरियाले गुप्तचरी गर्ने उद्देश्यले फेरि भूउपग्रह प्रक्षेपण गर्न सक्ने जापानले दाबी गरेको छ । जापानी सञ्चारमाध्यमले उत्तरले चाँडोमा बुधबार मध्यरातसम्म गुप्तचरी गर्न भूउपग्रह प्रक्षेपण गर्ने बताएका छन् ।
प्योङ्याङले नौ दिनको अवधिभित्र जासुसी भूउपग्रह प्रक्षेपण गर्ने जानकारी प्राप्त भएको जापानले दाबी गरेको छ । उक्त अवधि आगामी साता बिहीबार नोभेम्बर ३० को मध्यरातमा सकिन्छ ।
जापानले दक्षिण कोरियासँग मिलेर प्योङ्याङलाई त्यस्तो प्रक्षेपण रोक्न आग्रह गर्ने भएको छ । दुवै देशले जासुसी भूउपग्रह अन्तरिक्षमा पठाउनु संयुक्त राष्ट्रसङ्घबाट पारित सङ्कल्प प्रस्तावहरूको उल्लङ्घन गर्नु हो भनेका छन् ।
यसअघि उत्तर कोरियाले दुई पटक जासुसी भूउपग्रह अन्तरिक्षमा पठाउने प्रयास गरेको थियो। तर दुवै पटक प्रक्षेपणहरू विफल भएका थिए ।
गत अगस्ट महिनाको अन्तिम सातामा उत्तर कोरियाले दक्षिण कोरियाका सैन्य स्थलहरूमा परमाणु आक्रमणको ‘सिम्यूलेशन’ अर्थात परिकल्पनाका आधारमा गरिएको अभ्यास भन्दै छोटा दूरीका दुइटा बलिस्टिक क्षेप्यास्त्रहरू प्रहार गरिएको दाबी गरेको थियो ।
संयुक्त राज्य अमेरिका र दक्षिण कोरियाले संयुक्त सैन्य अभ्यास गरिरहेको बेला चेतावनी दिन प्योङ्याङले त्यसो गरेको बताएको थियो ।
