उडिरहेको विमानभित्रको खोरबाट जब घोडा निस्कियो…
अमेरिकाबाट बेल्जियमका लागि उडेको एउटा कार्गो विमानभित्र एउटा घोडा खोरबाट बाहिर निस्किएपछि झन्डै ९० मिनेटको उडान गरिसकेको विमान पुनः विमानस्थलमै फर्किएको छ ।
न्यूयोर्कबाट उडेको उक्त बोइङ ७४७ जेट झन्डै ९ हजार मिटरको उचाइमा हुँदा घोडा खोरबाट उम्किएको सूचना विमानचालकले दिएका थिए । न्यूयोर्कस्थित जोनएफ केनडी अन्तर्राष्ट्रिय विमानस्थलबाट उडेको एयर एट्ल्यान्टा आइसल्यान्डिकको उडान ४५९२ को नेतृत्व गरिरहेका विमानचालकले विमान सुरक्षित भए पनि खोरबाट घोडा भाग्नु चिन्ताको कारण भएको बताएका थिए ।
उनले विमान जोन एफ केनडी अन्तर्राष्ट्रिय विमानस्थलतिर फर्काउन लागेको जानकारी दिँदै त्यहाँ एक पशुचिकित्सक बोलाइदिन अनुरोध गरेका थिए । फेरि न्यूयोर्कतिर फर्किँदै गर्दा विमानचालकले म्यासचूसिट्सनजिकै विमानबाट १२ टन इन्धन फाल्नुपर्ने बताएका थिए। न्यान्टकिट धनाढ्यहरूको बस्ती भएको क्षेत्र हो ।
विमानको तौलका कारण त्यसरी इन्धन फाल्नुपरेको हो । विमानभित्र घोडा कसरी खोरबाट बाहिर निस्कियो भन्ने अझै खुलिसकेको छैन। तर विमानस्थलमा फेरि आइपुग्दा पनि उक्त घोडा फुक्कै थियो । न्यूयोर्कमा अवतरण गरेपछि एयर ट्राफिक कन्ट्रोलरले विमानचालकलाई केही सहायता चाहिएको छ कि भनेर सोधेका थिए ।
पछि उक्त विमान सोही दिन फेरि बेल्जियमका लागि उडेको र शुक्रबार बिहान लिएज विमानस्थलमा ओर्लिएको थियो । उक्त घोडा किन विमानमा राखेर बेल्जियम लगिएको थियो भन्ने कारण पनि स्पष्ट भइसकेको छैन । तर विज्ञहरूका अनुसार घोडादौडमा प्रयोग गरिने घोडाहरूलाई त्यसरी लगिन्छ ।
