हमासको आक्रमणमा कैयौँ इजरायलीको मृत्यु, प्यालेस्टिनी क्षेत्रमा इजरायलको हवाई हमला
इस्लामिक लडाकु समूह हमासले गरेको रकेट प्रहारका क्रममा इजरायलमा कम्तीमा २२ जनाको मृत्यु भएको छ । त्यस्तै ५४५ जना इजरायलीहरू घाइते भएका अधिकारीहरूले बताएका छन् ।
शनिबार बिहान हमासका लडाकुहरू गाजामा प्रवेश गरेर आक्रमण सुरु गरेका थिए । अपुष्ट खबरहरूमा जनाइए अनुसार कैयौँ इजरायलीलाई बन्दी बनाएर लगिएको छ । हमासको आक्रमणको जवाफमा इजरायलले पनि गाजामा प्यालेस्टिनी क्षेत्रहरूमा आक्रमण गरेको छ ।
इजरायली प्रधानमन्त्री बेन्जामिन नेतान्याहुले इजरायल युद्धमा रहेको र गाजाको शासक हमासले उसले कहिल्यै नसोचेको मूल्य चुकाउनु पर्ने बताएका छन् । अहिले इजरायलका दर्जनौँ लडाकु विमानहरूले गाजास्थित हमासका लडाकुहरू रहेको क्षेत्रमा हवाई हमला गरिरहेका छन् ।
आक्रमणमा परी कम्तीमा एक जना प्यालेस्टिनीको मृत्यु भएको स्थानीय स्वास्थ्य अधिकारीहरूले बताएका छन् । शनिबार सुरुमा इजरायलतर्फ दर्जनौँ रकेटहरू प्रहार गरिएको थियो ।
त्यसले गर्दा उक्त देशभरि हवाई आक्रमणको पूर्वसूचना दिने साइरनहरू बजेका थिए । तेल अभिभ र गाजा वरपरका क्षेत्रमा विस्फोटन भएका विवरण आएका थिए । प्यालेस्टिनी लडाकु समूह हमासले आक्रमणको जिम्मा लिएको थियो ।
उसको सशस्त्र बलले शनिबार २० मिनेटमा ५ हजार वटा रकेट प्रहार गरेको जनाएको छ । गाजा वरपरका बासिन्दाहरूलाई भित्रै बस्न भनिएको छ भने दक्षिणी र मध्य क्षेत्रका नागरिकहरूलाई सेल्टरको छेउमा बस्न भनिएको छ ।
