युक्रेनको जवाफी कारबाही सफल नभएको पुटिनको दावी

रूसी राष्ट्रपति भ्लादिमिर पुटिनले मस्कोका सेनालाई पछाडि धकेल्न गत महिना सुरु गरिएको कीभको जवाफी आक्रमण असफल भएको दावी गरेका छन् ।युक्रेनले पश्चिमा हतियारको भण्डार र आफ्नो आक्रामक सेनाको निर्माणपछि आफ्नो बहुप्रतीक्षित लडाई सुरु गरेको थियो ।

एक टेलिभिजन अन्तरवार्तामा पुटिनले आक्रमण सुरु भएदेखि नै उनीहरू सफल नभएका बताए । यूक्रेनले शुक्रवार रूसी सेनासँगको लडाईं कठिन अवस्थामा रहेको बताएको थियो ।

युक्रेनको राष्ट्रपति कार्यालयका प्रमुख एन्ड्री येरमाकले प्रतिकार अपेक्षित छिटो अघि नबढेको बताए । कीभका अनुसार गत एक हप्तामा उसका सेना दक्षिणी मोर्चामा करिब दुई किलोमिटर अघि बढेका छन् ।

युक्रेनी सेनाले मेलिटोपोल र बर्दयान्स्कतर्फ आक्रामक अभियान सञ्चालन गरिरहेको जनाएको थियो । युक्रेनका राष्ट्रपति भोलोदिमिर जेलेन्स्कीले गत हप्ता प्रतिज्ञा गरिएका हतियारहरूको ढिलो वितरणले कीभको प्रतिआक्रमणमा ढिलाइ भइरहेको बताएका थिए । उनले अमेरिका र अन्य सहयोगीहरूलाई लामो दूरीका हतियार र तोपखाना प्रदान गर्न आह्वान गरेका थिए ।