चीन रुसलाई घातक हतियार दिने तयारीमा रहेको अमेरिकी दाबी
अमेरिकी विदेशमन्त्री एन्टोनी ब्लिङ्कनले चीनले युक्रेन युद्धका लागि रुसलाई हातहतियार र गोलाबारुद दिने विषयमा विचार गरिरहेको आरोप लगाएका छन् ।
ब्लिङ्कनले सीबीएस न्यूजसँगको कुराकानीमा चिनियाँ कम्पनीहरूले पहिले नै रुसलाई गैरघातक सहयोग उपलब्ध गराउँदै आएको र नयाँ सूचनाले बेइजिङले मस्कोलाई घातक खालका सहयोग पनि प्रदान गर्न सक्ने सङ्केत दिएको बताए ।
यदि चीनले त्यसो गरे त्यसको परिणाम गम्भीर हुने चेतावनी उनले दिए । चीनले चाहिँ मस्कोले सैन्य उपकरण माग गरेको समाचारलाई अस्वीकार गरेको छ । चिनियाँ राष्ट्रपति सी जिनपिङ रुसी राष्ट्रपति भ्लादिमिर पुटिनका सहयोगी हुन् र उनले युक्रेनमाथि रुसले गरेको आक्रमणको निन्दा गरेका छैनन् ।
तर यो द्वन्द्वमा तटस्थ रहन खोज्दै उनले शान्तिका लागि आह्वान गरेका छन् । चिनियाँ विदेश मन्त्रालयले रुससँगको सम्बन्धलाई लिएर अमेरिकाको औँला देखाउने र जबरजस्ती गर्ने कार्यलाई स्वीकार नगर्ने बताएको छ ।
ब्लिङ्कनले शनिबार म्युनिख सुरक्षा सम्मेलनमा चीनका शीर्ष कूटनीतिज्ञ वाङ यीसँग भेट गरेपछि सीबीएससँग कुराकानी गर्दै चीनलाई चेतावनी दिएका थिए । उनले बैठकमा आफूले चीनले रुसलाई घातक सामग्री सहयोग गर्ने सम्भावनाबारे गहिरो चिन्ता व्यक्त गरेको बताए ।
अमेरिकाले रुसलाई हजारौँ लडाकु विमानहरू आपूर्ति गर्ने वाग्नर समूहलाई युक्रेनको स्याटलाइट नक्साहरू उपलब्ध गराएको आरोपमा एउटा चिनियाँ कम्पनीमाथि प्रतिबन्ध लगाएको छ।
