जेलेन्स्की भन्छन्-शान्ति सम्झौताका लागि रुसलाई आफ्नो भूमि छाड्दैनौँ
युक्रेनका राष्ट्रपति भोलोदिमिर जेलेन्स्कीले रुससँगको सम्भावित शान्ति सम्झौतामा आफ्नो देशको कुनै पनि भूभाग नत्याग्ने बताएका छन् ।
रुसले पूर्ण मात्राको आक्रमण सुरु गरेको एक वर्ष भएका बेला बीबीसीसँगको अन्तर्वार्तामा उनले भूमि दिने कुरा स्वीकार गर्नुको अर्थ रुस फेरि फिर्ता आउन सक्छ भन्ने रहेको बताए ।
पश्चिमा देशहरूले युक्रेनलाई दिएका अस्त्रका कारण शान्तिलाई नजिक ल्याउने उनले आशा व्यक्त गरे । जेलेन्स्कीले वसन्त ऋतुमा हुनसक्ने सम्भावित आक्रमण अहिले नै सुरु भइसकेको बताए । उनले भने,’अहिले नै विभिन्न दिशाबाट रुसी आक्रमण भइरहेका छन् ।’
उनी युक्रेनी सैनिकहरूले उनीहरूले प्रत्याक्रमण सुरु गर्नसक्ने बेलासम्म रुसी विस्तारको गतिलाई रोक्ने कुरामा विश्वस्त देखिएका छन् । यद्यपि उनले पश्चिमी देशहरूलाई सैन्य सहायताका लागि पुनः आह्वान गरेका छन् ।
उनले भने,’निःसन्देह रूपमा परिष्कृत र आधुनिक अस्त्रले मात्र शान्तिलाई गति दिन्छ। अस्त्रको भाषा मात्र रुसले बुझ्ने भाषा हो ।’
राष्ट्रपति जेलेन्स्कीले अन्तर्राष्ट्रिय समर्थन मजबुत बनाउन र आफ्नो देशको रक्षाका लागि आधुनिक हतियार माग्ने प्रयासमा गत साता ब्रिटेन र ईयूका नेताहरूसँग भेटेका थिए ।
गत महिना जर्मनी, अमेरिका र ब्रिटेन लगायतका पश्चिमी देशहरूले दिने प्रतिबद्धता जनाएका युद्धमा प्रयोग हुने ट्याङ्कहरू अझै पनि युद्धको मैदानमा पुग्न केही साता लाग्ने देखिएको छ।
