ह्वाइट हाउसले भन्यो-लडाकू विमानले खसालेको वस्तुको चिनियाँ जासुसीसँग सम्बन्ध छैन
अमेरिकी सेनाले गत साता लडाकु विमान प्रयोग गरी खसालेका तीनवटा अपरिचित वस्तुको चिनियाँ जासुसीसँग सम्बन्ध भएको कुनै सङ्केत नपाइएको ह्वाइट हाउसले जनाएको छ ।
राष्ट्रिय सुरक्षा प्रवक्ता जोन कर्बीले ती वस्तुहरू व्यावसायिक वा अनुसन्धान गर्ने संस्थाहरूसँग सम्बन्धित हुनसक्ने र ती हानिकारक नहुन सक्ने बताए ।
अमेरिका र क्यानडाका अधिकारीहरूले अहिलेसम्म खसालिएका ती तीनवटै वस्तुको कुनै अवशेष फेला पार्न सकेका छैनन् ।
बेइजिङले यसअघि अमेरिकालाई हिंसालाई प्रेरित गर्ने खालको प्रतिक्रिया दिएको आरोप लगाएको थियो । अमेरिकाले यसै महिनाको सुरुमा साउथ क्यारोलाइनाको तटमा एउटा चिनियाँ बलुन खसालेको थियो ।
चीनले जासुसीका लागि उक्त बलुन प्रयोग गरेको अमेरिकी आरोप थियो । तर चीनले त्यसलाई अस्वीकार गर्दै त्यो केवल मौसम अनुगमन गर्ने कार्यका लागि प्रयोग भएको बताएको थियो ।
सबैभन्दा पछिल्लो कारबाहीमा अमेरिकी एफ–१६ लडाकु विमानले ह्यूरन तालमाथि उडिरहेको वस्तुमा साइडविन्डर क्षेप्यास्त्र प्रहार गरेको थियो ।
तर पहिलो क्षेप्यास्त्रको निसाना चुकेको एक उच्च अमेरिकी सैन्य अधिकारीले पुष्टि गरेका छन् । हवाईक्षेत्रमा पनि अन्य कुनै क्षति र असर नपर्नेगरी क्षेप्यास्त्र प्रहार गर्ने नीतिअनुसार उक्त वस्तुलाई ह्यूरन तालमा खसालिएको उनले बताए।
