चिनियाँ कम्पनीलाई निर्यात नियन्त्रण सूचीमा नराख्न अमेरिकालाई चीनको आग्रह
चीनले सैन्य हवाई जहाजजस्ता चीनको एयरोस्पेस कार्यक्रमलाई समर्थन गर्ने तथाकथित आधारमा छ वटा चिनियाँ कम्पनीहरूलाई आफ्नो निर्यात नियन्त्रण सूचीमा राख्ने अमेरिकी कदमको कडा विरोध गरेको छ ।
वाणिज्य मन्त्रालयका प्रवक्ताको लामो समयदेखि संयुक्त राज्य अमेरिकाले अन्य देशका कम्पनीहरूलाई दमन गर्न र नियमित आर्थिक र व्यापार आदानप्रदानमा बाधा पुर्याउन निर्यात नियन्त्रण उपायहरूको दुरूपयोग गर्दै आएको दाबी छ ।
यी कदमहरूले प्रभावित कम्पनीहरूको वैध अधिकार र हितमा गम्भीर आघात पुर्याएको छ । यस किसिमका गतिविधिले विश्वव्यापी आपूर्ति शृङ्खलाको सुरक्षा र स्थिरतालाई कमजोर पारेको छ ।
मन्दीग्रस्त विश्व अर्थतन्त्रमा देखिएको समस्यालाई सुल्झ्याउन पनि यस कदमले बाधा पुर्याएको प्रवक्ताको दाबी छ । साथै चीनले अमेरिकी पक्षलाई चिनियाँ फर्महरूको आधारहीन दमन रोक्न आग्रह गरेको छ । प्रवक्ताले देशले आफ्ना फर्महरूको वैध अधिकार र हितको रक्षा गर्न आवश्यक कदम चाल्ने पनि बताएका छन् ।
