भारतस्थित बीबीसी कार्यालयमा कर विभागको खानतलासी
बीबीसीका भारतस्थित कार्यालयहरूमा एउटा अनुसन्धानका सिलसिलामा आयकर विभागका अधिकारीहरूले खानतलासी गरेका छन् ।
बीबीसीले बेलायतमा भारतका वर्तमान प्रधानमन्त्री नरेन्द्र मोदीको आलोचना गरिएको एउटा डक्यूमेन्ट्री प्रसारण गरेको केही सातापछि उसका नयाँदिल्ली र मुम्बईस्थित कार्यालयहरूमा खानतलासी गरिएको हो ।
उक्त डक्यूमेन्ट्री सन् २००२ मा गुजरात राज्यमा भएका मुस्लिमविरोधी हिंसामा अहिलेका भारतीय प्रधानमन्त्रीको भूमिकामा केन्द्रित थियो। त्यतिबेला उनी गुजरातका मुख्यमन्त्री थिए । बीबीसीले उसले अधिकारीहरूलाई पूर्ण सहयोग गरिरहेको जनाएको छ ।
उक्त डक्यूमेन्ट्री बेलायतको टेलिभिजनमा मात्र प्रसारण गरिएको भएपनि भारत सरकारले उक्त डक्यूमेन्ट्री अनलाइनमार्फत् मानिसहरूले शेयर गर्न नपाऊन् भनेर रोक्ने प्रयास गरेको थियो ।
गत महिना दिल्लीमा उक्त डक्यूमेन्ट्री हेर्न जम्मा भएका विद्यार्थीहरूलाई प्रहरीले नियन्त्रणमा लिएको थियो ।
विपक्षी दल कांग्रेसका महासचिव केसी वेणुगोपालले मङ्गलबारको कारबाहीमा ‘हताश मनस्थितिको गन्ध आएको र मोदी सरकार आलोचनाबाट डराएको देखिएको बताएका छन्। सम्पादकहरूको समूह एडिटर्स गिल्ड अफ इन्डियाले आफू खानतलासीको उक्त घटनाबाट गम्भीर रूपमा चिन्तित भएको बताएको छ ।
ब्रिटिश विदेश मन्त्रालयबाट बीबीसीले प्राप्त गरेको उक्त प्रतिवेदनमा गुजरातको धार्मिक दङ्गामा मोदीको भूमिकाहरूबारे प्रश्न उठाइएको छ । त्यसबेला गुजरातमा हिन्दू तीर्थयात्रीहरू रहेको एउटा रेलमा आगलागी हुँदा दर्जनौँको सङ्ख्यामा मानिसहरू मारिएका थिए ।
त्यस घटनाको भोलिपल्ट भड्किएको हिंसामा परेर धेरै मुस्लिमसहित एकहजार जनाभन्दा बढी मानिसको ज्यान गएको थियो।