६ महिने भिसाका लागि ब्राजिलका पूर्वराष्ट्रपतिको अनुरोध
ब्राजिलाका पूर्वराष्ट्रपति जेर बोल्सोनारोले ६ महिनाका निम्ति आफूलाई प्रवेशाज्ञा प्रदान गर्न अमेरिका सरकारसमक्ष अनुरोध गरेका छन् ।
पूर्वराष्ट्रपतिको अमेरिका बस्ने यो चाहनाले उनी तत्काल स्वदेश फर्कने सम्भावना प्रायः समाप्त भएको अनुमान गरिएको छ । स्वदेशमा उनीमाथि विविध कानुनी अड्चन आउने सम्भावना छन् ।
पूर्वराष्ट्रपतिले अमेरिकी भिसाका लागि आवेदन दिएको उनका आप्रवासनसम्बन्धी वकिललाई उदृत गर्दै ‘द फिनान्सियल टाइम्ज’ले सार्वजनिक गरेको थियो ।
गत डिसेम्बर ३० मा पूर्वराष्ट्रपति बोल्सोनारो अमेरिकाको फ्लरिडा प्रस्थान गरेका थिए । त्यसको दुई दिनपछि ब्रजिलमा नयाँ राष्ट्रपतिले कार्यभार सम्हाल्ने दिन थियो ।
उक्त दिन देशको स्थिति सामान्य रहे पनि एक सातापछि उनीका समर्थकले देशव्यापी आन्दोलन गरेर राष्ट्रपति लुइज इनाकियो लुला डिसिल्भाको निर्वाचन बदर हुनुपर्ने माग गर्दै आन्दोलन चर्काएका थिए ।
पूर्वराष्ट्रपति बोल्सोनारोले आन्दोलन भड्काएको लगायत विभिन्न आरोप लागेको छ । तीन दशक लामो राजनीतिक यात्रा पार गर्नुभएका बोल्सोनारोलाई ब्राजिल सरकारले पूर्वराष्ट्रपतिका रुपमा कुनै पनि सुविधा उपलब्ध गराएको छैन । उनीमाथि सर्वोच्च अदालतले सुनुवाइ गर्न बाँकी छ ।
