इरानमा सरकारविरोधी प्रदर्शनकारीलाई मृत्युदण्ड
इरानले सरकारविरुद्ध जारी प्रदर्शनमा सहभागी एक व्यक्तिलाई मृत्युदण्ड दिएको छ । विरोध प्रदर्शन गर्नेलाई मृत्युदण्ड दिइएको यो पहिलो घटना हो।
मोहसिन शेकारीलाई बिहीवार बिहान फाँसी दिइएको थियो । उनीमाथि एउटा रिभोल्यूशनरी अदालतले मोहरेबेह अर्थात् ईश्वरविरुद्ध युद्ध शुरू गरेको आरोप लगाइएको थियो ।
सेप्टेम्बरमा तेहरानको मुख्य सडक अवरुद्ध गरेको र अर्धसैनिक बलका एक सदस्यलाई छुरा प्रहार गरी घाइते बनाएको अभियोग थियो । एक अभियानकर्मीका अनुसार उनलाई कुनै प्रकियाबिना दोषी ठहर गरिएको थियो ।
बसिज प्रतिकार बललाई प्रायः विरोध प्रदर्शनहरूलाई शान्त बनाउन खटाइन्छ । नोभेम्बर १ मा अदालतले शेकरीलाई हत्या गर्ने, आतङ्क मच्चाउने र समाजको सुरक्षामा खलल पुर्याउने नियतले झगडा गरेको एवं हतियार बोकेको आरोपमा दोषी ठहर गरेको हो ।
अदालतको फैसलाविरुद्ध दोषी भनिएका शेकारीले अपील गरेका थिए। तर उनीविरुद्ध पुरानै फैसलालाई सर्वोच्च अदालतले सदर गरेको थियो ।
