इण्डोनेशियामा भूकम्पमा परी ५६ को मृत्यु, ७ सय घाइते
इण्डोनेशियाको पश्चिम जाभाको चिआनजोरमा आएको भूकम्पका कारण कम्तीमा ५६ जनाको ज्यान गएको र कम्तीमा ७०० जना घाइते भएका अधिकारीहरूले बताएका छन् ।
उक्त क्षेत्रका एक सरकारी अधिकारीले करिब २० जनाको एउटै अस्पतालमा ज्यान गएको बताए । सयौँ मानिसहरूको उपचार भइरहेको उनले बताए ।
उक्त भूकम्प ५.६ म्याग्निच्युडको भएको र त्यसको कम्पन सय किलोमिटर पर रहेको राजधानी जाकार्तामा समेत अनुभव गरिएको बताइएको छ ।
त्यहाँको व्यापारिक क्षेत्रमा कार्यालयहरूबाट मानिसहरू भागेका थिए । भूकम्पमा परेर हताहत हुनेको सङ्ख्या अझ बढ्न सक्ने अधिकारीहरूले बताएका छन् ।
निजी घरहरू, इस्लामिक बोर्डिङ् स्कूल तथा सरकारी भवनहरूका अतिरिक्त चिआन्जोर अस्पतालमा समेत क्षति पुगेको बताइएको छ।
