१८ वर्ष पेरिस विमानस्थलको बास, त्यहीँ गयो अन्तिम सास
पेरिसको विमानस्थलमा १८ वर्षसम्म बसेका एक इरानी पुरुषको निधन भएको छ । कूटनीतिक गतिरोधका कारण कतै जान नपाएपछि मेहरन करिमी नासेरीले रोसी सार्ल डु गोल विमानस्थललाई सन् १९८८ मा आफ्नो निवास बनाएका थिए ।
उनको अनुभवमा केन्द्रित रहेर सन् २००४ मा द टर्मिनल चलचित्र बनेको थियो जसमा टम ह्याङ्क्स् मुख्य अभिनेता थिए । नासेरीलाई अन्ततः फ्रान्समा बस्ने अनुमति दिइएको थियो।
तर उनी केही हप्ता अघि विमानस्थल फर्किएका थिए र उनको प्राकृतिक ढङ्गले निधन भएको विमानस्थलका एक जना अधिकारीर्ले बताएका छन् ।
इरानको कुजेस्तान प्रान्तमा जन्मिएका उनी आफ्नी आमाको खोजीमा पहिलो पटक युरोप गएका थिए । केही वर्ष बेल्जियममा विताएका उनलाई बेलायत, नेदरल्याण्ड्स र जर्मनीसहित कैयौँ देशहरूले आप्रवासन सम्बन्धी वास्तविक कागजपत्र नभएको कारण देशबाट निकाला गरेका थिए ।
त्यसपछि फ्रान्स गएका उनले विमानस्थलको टुएफ टर्मिनललाई नै आफ्नो घर बनाएका थिए । आफूसँग भएका सामग्रीहरू राखिएका ट्रलीलाई उनले आफू बस्ने बेन्च बनाएका थिए । आफ्नो दैनिकी नोटबुकमा लेख्ने बानी बसालेका उनले पुस्तक अनि पत्रपत्रिका अध्ययन गरेर दिन बिताउने गरेका थिए ।
उनको कथाले अन्तर्राष्ट्रिय सञ्चारमाध्यमको ध्यान तानेको थियो र उनीबारे चलचित्र बनेपछि कैयौँ पत्रकारहरू उनलाई भेट्न पुगेका थिए । आफूलाई ‘सर अल्फ्रेड’ भनेर चिनाउने उनले एउटा विन्दुमा दिनको ६ वटासम्म अन्तरवार्ता दिएका थिए ।
शरणार्थीको हैसियत र फ्रान्समा बस्न सक्ने अधिकार सन् १९९९ मा दिइएपनि उनी सन् २००६ सम्म विमानस्थलमै बसेका थिए । विरामी भएर उपचारका लागि अस्पताल लगिएपछि मात्रै उनले चलचित्रबाट पाएको पैसाको प्रयोग गरेर होस्टेलमा बस्न थालेका थिए ।
मृत्यु हुनु केही हप्ताअघि उनी विमानस्थलमा फर्किएको एक जना अधिकारीले बताए । उनका अनुसार नासेरीको साथबाट कैयौँ हजार युरो फेला परेको थियो ।
