युक्रेनी राष्ट्रपति भोलोदिमिर जेलेन्स्कीले युद्ध भइरहेको पूर्वी युक्रेन स्थानबाट निकै टाढा रहेको एउटा युक्रेनी सहरमा घातक आक्रमण भएपछि त्यसलाई खुलमखुला गरिएको आतङ्कवादी कार्यको सङ्ज्ञा दिएका छन् ।
भिनित्सिया सहरको एउटा आवासीय क्षेत्रमा रुसी क्षेप्यास्त्रहरू प्रहार भएपछि तीन बालबालिकासहित कम्तीमा २३ जनाको मृत्यु भएको अधिकारीहरूले बताएका छन्।
घटनामा एकसय जनाभन्दा बढी घाइते भएको बताइएको छ । अहिले किएभको दक्षिणपश्चिम र डोन्बासमा लडाइँ भइरहेको छ। तर भिनित्सिया ती स्थानबाट निकै पर छ ।
झन्डै तीन लाख ७० हजार मानिस बसोबास गर्ने सहरमा एउटा ९ तले भवनको कार पार्किङस्थलमा क्षेप्यास्त्र प्रहार भएपछि युक्रेनी राष्ट्रपतिले रुसको आलोचना गर्दै त्यस्तो टिप्पणी गरेका बीबीसीले उल्लेख गरेको छ ।
उक्त आक्रमणका कारण सहरको मध्य भागमा अवस्थित अरू आवासीय भवनहरू पनि प्रभावित भएका थिए । युक्रेनी आपत्कालीन सेवाका अधिकारीहरूले मानिसहरू जीवित भेटिने सम्भावना कम रहेको बताएका छन् ।
युक्रेनी अधिकारीहरूका अनुसार ज्यान गुमाउने बालबालिकामध्ये लिजा नाम गरेकी एक बालिका आफ्नो स्पीच थेरपी सत्र सकेर घर फर्किरहेकी थिइन्। आक्रमणमा पर्दा उनकी आमा सँगै थिइन् ।
प्रतिक्रिया