चार जना गैर पेशेवर यात्री ‘प्रेरणादायी’ अन्तरिक्ष अभियानमा
चार जना गैर पेशेवर अन्तरिक्षयात्रीहरू अमेरिकाको फ्लोरिडाबाट पृथ्वीको कक्षको भ्रमणका लागि निजी यात्रामा निस्किएका छन् । इन्स्पिरेशन फोर नामक उक्त अभियानमा एक जना अर्बपति र तीन साधारण व्यक्ति सहभागी छन् ।
स्पेसएक्स रकेट कम्पनीले उपलब्ध गराएको ’ड्रयागन क्याप्सुल’मा सवार भएर उक्त समूह केनेडी स्पेस सेन्टरबाट अन्तरिक्ष यात्रामा निस्किएको हो । ती चार जनाले अबको तीन दिन पृथ्वीको परिक्रमा गरेर बिताउनेछन् ।
पछिल्लो घटनाक्रम अन्तरिक्ष पर्यटन बजारका लागि महत्त्वपूर्ण कोशेढुङ्गा भनिएको छ । एक दशकको अवरोधपछि अन्तरिक्ष पर्यटनले पुनः गति लिएको छ । यसै वर्षको गर्मीयाममा अमेरिकी अर्बपति सर रिचर्ड ब्र्यान्सन र जेफ बेजोसले आफ्नै अन्तरिक्ष यानको प्रयोग गरी पृथ्वीको वायुमण्डलभन्दा माथि यात्रामा गरेका थिए ।
अहिलेको अन्तरिक्ष अभियान पछाडि अन्तर्राष्ट्रिय अन्तरिक्ष केन्द्रमा दुईवटा निजी भ्रमण हुन लागेको छ । अक्टोबरमा एक जना रुसी चलचित्र निर्देशक र एक जना नायिकाले अन्तरिक्षको भ्रमण गर्दैछन् भने दोस्रो भ्रमण भने नयाँ वर्षको प्रारम्भमा हुने भनिएको छ ।
इन्स्पिरेशन फोरमा यात्रा गर्ने चार जना सदस्यहरूले स्पेसएक्ससँग ६ महिनाको विस्तृत तालिम लिएका थिए । तर उनीहरूको ड्रायगन क्याप्सुलको नियन्त्रण जमिनमा रहेको स्पेसएक्स समूहकै हातमा हुनेछ ।
उक्त यानले तोकिएको ५ सय ७५ किलोमिटरको उचाइसम्म स्वतन्त्र उडान गर्नेछ । ठूलो झ्यालको सिसाले यात्रामा सवार चार जनालाई पृथ्वीको गज्जबको दृश्य हेर्ने मौका मिल्नेछ । त्यो पृथ्वीको कक्षमा अवस्थित प्रयोगशाला भन्दा करिब १ सय ५० किलोमिटर माथि हो र हब्बल स्पेस टेलिस्कोपले ब्रम्हान्ड हेर्न प्रयोग गर्ने लगभग उचाइ हो ।
निश्चित गन्तव्य नभएपनि चार जनाका लागि यात्रा अवधिमा पर्याप्त रूपमा व्यस्त राख्ने कामहरू छन्। उनीहरूले ड्रयागन क्याप्सुल भित्रै वैज्ञानिक परीक्षणहरू गर्नेछन् । स्पेसएक्सले उनीहरूको अस्थायी बस्ने ठाउँ भित्र बनाइदिएको ठूलो झ्यालका मद्दतले तल रहेको पृथ्वी हेरेर उनीहरूले आनन्द लिने निश्चित जस्तै छ ।
इन्स्पिरेशन फोर कार्यक्रमलाई स्पेसएक्सबाट ३८ वर्षका ज्यारेड आइज्याकम्यानले खरिद गरेका थिए । क्रेडिट कार्डबाट रकम तिर्ने प्रणाली विकास गरेर मनग्गे कमाएका उनले अन्तरिक्ष उडानलाई निश्चित उद्देश्य दिने निर्णय गरेका थिए ।
त्यही भएर उनले तीन सिट प्रेरणादायी कथा भएका व्यक्तिहरूलाई उपहार दिने निर्णय गरे । त्यो यात्रामा गइरहेकी २९ वर्षकी हेली एर्सेनोको सन्दर्भमा त्यो सबैभन्दा राम्रोसँग झल्कन्छ।
