इथियोपियामा हजारौँ टिग्रे विद्रोही मारिएका सेनाको दाबी

इथियोपियाको सेनाले आफूसँग देशको उत्तरी भेगमा युद्ध गरिरहेको टिग्रेका विद्रोही समूहका ५ हजार ६०० जनाभन्दा बढी सदस्य मारिएको दाबी गरेको छ । उक्त क्षेत्रमा गत नोभेम्बर महिनादेखि हिंसात्मक द्वन्द्व भइरहेको छ । वरिष्ठ सैन्य अधिकारी बाशा डुबेलका अनुसार २,३०० विद्रोही घाइते भएका छन् भने २,००० पक्राउ परेका छन् ।

उनले कति समयावधिमा ती विद्रोहीहरू हताहत भएका हुन् भन्ने खुलाएनन्। तर संवाददाताहरू पछिल्ला युद्धमै त्यति सङ्ख्यामा विद्रोहीहरू मारिएको वा घाइते भएको हुनसक्ने ठान्छन् । संयुक्त राष्ट्रसङ्घका अनुसार युद्धका कारण लाखौँ मानिसहरूले भोकमरीको मारमा परेका छन् । लेफ्टिनेन्ट जेनरल डुबेलले टीपीएलएफ भनेर चिनिने टिग्रे पीपल्स लिबरेशन फ्रन्टले इथियोपियालाई विभाजन गर्न खोजेको आरोप लगाएका छन् ।

टीपीएलफको एउटा समूहले टिग्रे र अम्हाराबीचको सीमामा रहेको हुमेरा क्षेत्र नियन्त्रणमा लिने प्रयास गरेको भए पनि त्यो पूर्ण रूपमा विफल भएको उनले बताएका छन् । सेनाको दाबीबारे टीपीएलएफले कुने प्रतिक्रिया जनाएको छैन । प्रधानमन्त्री आबी अहमद र टिग्रे क्षेत्रको प्रमुख राजनीतिक शक्ति टीपीएलएफबीच लामो समयसम्म चलेको असमझदारीपश्चात् गत वर्ष दुई पक्षबीच युद्ध सुरु भएको थियो ।

सेनाका कैयौँ शिविरमा गरिएका आक्रमणमा टीपीएलएफको हात रहेको आरोप लगाउँदै सङ्घीय सरकारले टिग्रे क्षेत्रमा प्रादेशिक सरकारलाई विस्थापित गर्नका लागि सेना परिचालन गरेको थियो । त्यस क्रममा हजारौँ मानिसले ज्यान गुमाएका थिए भने लाखौँ मानिस घर छाडेर भाग्न बाध्य भएका थिए । दुवै पक्षलाई बलात्कार र हत्यासहित अत्याचार गरेको आरोप लगाइएको छ ।

शुक्रवार संयुक्त राष्ट्रसङ्घले टिग्रे क्षेत्रमा सहायता दिने प्रक्रियालाई सरकारले प्रभावकारी रूपमा अवरुद्ध गरेको आरोप लगाएको छ । उसले लाखौँ मानिसको जीवन खतरामा रहेको चेतावनी दिएको छ। तर शनिवार इथियोपिया सरकारले भने सहायताका लागि पछिल्लो दुई दिनमा १५२ ट्रकसहित कुल ५०० वटा ट्रक उक्त क्षेत्रमा प्रवेश गरेको जनाएको छ ।