अफगानिस्तानको उत्पन्न सङ्कटलाई लिएर विश्वभरिबाट चासो व्यक्त
दुई दशकपछि अफगानिस्तानमा तालिबान समूह पुनः शक्तिमा आएसँगै त्यहाँ उत्पन्न सङ्कटलाई लिएर विश्वभरिबाट चासो व्यक्त भइरहेको छ । पछिल्लो सङ्घर्षका कारण मानिसहरू विस्थापित हुँदा चुनौती थपिएको अन्तर्राष्ट्रिय सहायता निकायहरूले जनाएका छन् । तिनीहरूका अनुसार राजधानी काबुलमै ठूलो सङ्ख्यामा विस्थापितहरू आइपुगेका छन् ।
काबुलस्थित विश्व खाद्य कार्यक्रम, अफगानिस्तानकी उपप्रमुख शावे लीले बीबीसीसँग कुरा गर्दै अहिलेको अवस्था एकदमै तरल र अनिश्चितताको रहेको बताए । उनले यो अवस्थामा पनि देशको अधिकांश क्षेत्रमा आफ्नो पहुँच कायम गर्न नसकिरहेको बताए । पहुँच कायम गर्न धेरै चुनौतीहरू रहेका उनले बताए ।
उनले भने, ‘अहिले हामीले हेरिरहेको एउटा कुरा यो वर्षको बाँकी समयका लागि अफगान नागरिकको सहयोगका निम्ति विश्व खाद्य कार्यक्रमलाई २० करोड डलर आवश्यक पर्नेछ । अरू अवरोधको कुरा गर्नुपर्दा सीमानाका भएर सहायता सामग्री ल्याउने कुरा हुन सक्छ।’
उनले अहिले प्रत्येक तीनमध्ये एकजना अर्थात् करिब एक करोड ४० लाख मानिसले भोकमरीको सामना गर्नु परेको र बीस लाख बालबालिका कुपोषणको मारमा परेका उनले बताए । त्यस्तो हुनुको पछाडिदुई वर्षदेखि अफगानिस्तानले झेल्नु परेको खडेरी, सामाजिक–आर्थिक चुनौती, कोभिड–१९ का कारण भएको महँगी र अन्य विविध पक्ष छन् ।
