म्यान्मारमा सैनिक कू पछि पहिलो पटक देखिइन् सूकी

म्यान्मारमा सैनिक कू भएको एक महिनापछि पहिलो पटक नेत्री आङ सान सूकी देखिएकी छन् । उनी सोमवार भिडियो लिङ्कमार्फत राजधानीको एक अदालतमा उपस्थित भएकी हुन् । उनीमाथि विनाअनुमति वाकीटकी सेट आयात गरेको, कोभिडसम्बन्धी प्रतिबन्धहरू पालना नगरेको र डर पैदा गर्न सक्ने सूचना प्रकाशित गरेको आरोप लगाइएको छ ।

ती अभियोगहरू सामान्य देखिए पनि त्यसले उनलाई कुनै पदभार ग्रहण गर्न रोक लगाउन सक्छ । आइतवार मात्रै म्यान्मारमा हिंसात्मक बनेको प्रदर्शनमा प्रहरीको गोलीबाट १८ जनाको मृत्यु भएको थियो । याङ्गुनमा सोमवार पनि प्रदर्शन भइरहेका छन्।