सुशान्त मृत्यु प्रकरणः सलमान, शाहरुख र आमिर खान समाचार प्रस्तोताविरुद्ध अदालतमा

भारतीय चलचित्र उद्योग बलीउडका केही ठूला निर्माता कम्पनीहरूले केही भारतीय सञ्चारमाध्यमको गैरजिम्मेवार रिपोर्टिङकाविरुद्ध अदालतमा मुद्दा हालेका छन् । यो घटना जुनमा अभिनेता सुशान्त सिंह राजपूतको मृत्युपश्चात् सुरु भएको हो ।

उनले आत्महत्या गरेको ठानिएको छ । तर यो मामिलालाई लिएर महिनौँसम्म भारतका टेलिभिजन न्यूज च्यानलहरूले अनवरत रिपोर्टिङ गरेका छन् । शाहरुख खान, आमिर खान तथा सलमान खानसहितका बलीउडका दर्जनौँ निर्माता कम्पनीले अहिले ती रिपोर्टिङका केही शैलीलाई लिएर कारबाहीको माग गरेका हुन् ।

प्रतिवादीहरूका हिलो छ्याप्ने अभियानका कारण बलीउडसँग सम्बद्ध मानिसहरूको जीविकामा प्रभाव परेको रिट निवेदनमा जिकिर गरिएको छ । पछिल्ला महिनाहरूमा भारतीय सञ्चारमाध्यममा ती अभिनेताको निधनको समाचार छाएको थियो । अहिले दुईवटा च्यानल र तिनका चार समाचार प्रस्तोताविरुद्ध कुल ३४ निर्माता एवम् फिल्म उद्योगसम्बद्ध चारवटा सङ्घहरूले दिल्लीमा उक्त मुद्दा हालेका छन् । प्रतिवादीहरूको प्रतिक्रिया आइसकेको छैन ।

उक्त मुद्दा रिपब्लिक टीभी र त्यसका प्रस्तोता अर्णव गोस्वामी र प्रदीप भण्डारी अनि टाइम्स नाउ टीभी र उसका प्रस्तोता राहुल शिवशङ्कर र नविका कुमारविरुद्ध हालिएको छ । चौतीस वर्षीय राजपूत मुम्बईस्थित उनकै फ्ल्याटमा जुन १४ तारिख मृत फेला परेका थिए ।

उनले आत्महत्या गरेको प्रहरीले बताएको थियो । तर उनका परिवारले उनको प्रेमिका रिया चक्रवर्तीविरुद्ध आत्महत्या गर्न उक्साएको तथा अन्य अपराध गरेको भन्दै प्रहरीमा निवेदन दिए ।

चक्रवर्तीले ती आरोप अस्वीकार गरिन् । त्यसयता अभिनेत्री दीपिका पादुकोनसहित कैयौँ कलाकारसँग सोधपुछ गरिएको छ। ती कसैलाई कुनै गल्ती गरेको आरोप भने लगाइएको छैन । सो मामिलालाई अहिले तीनवटा सङ्घीय निकायले अनुसन्धान गरिरहेका छन् । अनुसन्धानकर्ताहरूले सञ्चारमाध्यममा बेलाबखत टुक्राटाक्री जानकारी दिन थालेपछि के भएको हो अनि को जिम्मेवार हो भन्ने विषयमा हल्ला तथा अनुमान व्याप्त भएका थिए ।