आर्मेनिया र अजरबैजानबीच पृथक्तावादी क्षेत्रमा लडाइँ, कम्तिमा २४ जनाको मृत्यु
आर्मेनिया र अजरबैजानबीच पृथक्तावादी क्षेत्र नागोरनो–काराबाखका विषयमा शुरू भएको लडाइँ चर्किंदै गएको छ । अहिलेसम्म त्यहाँ २४ जनाको मृत्यु भइसकेको छ र सयौं मानिस घाइते भएका छन् । टर्कीका राष्ट्रपति रेचेप तैयिप एर्दोआनले आर्मेनियालाई धम्की दिँदै अजरबैजानलाई खुलेर समर्थन गरेका छन् ।
उता आर्मेनियाको परम्परागत सहयोगी रुसले तत्कालै युद्धविराम घोषणा गर्न र परिस्थितिलाई शान्त बनाउनका लागि वार्ताको आह्वान गरेको छ । आर्मेनियाले अजरबैजानका चारवटा हेलिकप्टर खसाएको र ३३ ट्यांक तथा लडाकू वाहनलाई पनि निशाना बनाएको दाबी गरेको छ ।
अहिले लडाइँ शुरू भएको ठाउँ अजरबैजानअन्तर्गत पर्छ तर सन् १९९४ देखि नै आर्मेनिया समर्थित फौजहरूको उपस्थिति छ । यसअघि जुलाई महिनामा पनि झडपहरू भएका थिए र १६ जनाको मृत्यु भएको थियो ।
अजरबैजानका केही क्षेत्रमा मार्सल ल लगाइएको छ र प्रमुख शहरहरूमा कर्फ्युको आदेश दिइएको छ । अजरबैजानले काराबाखमा रणनीतिक रूपमा महत्त्वपूर्ण पहाडमा कब्जा गरेको बताएको छ ।
आर्मेनिया ईसाईबहुल तथा अजरबैजान बहुमत मुस्लिम भएको देश हो । अजरबैजानमा टर्किश मूलका धेरै मानिस बस्छन् । यो क्षेत्रीय युद्धमा परिणत हुने खतरा बढेको भनी विश्लेषकहरूले चिन्ता व्यक्त गरेका छन् ।