रुसी विपक्षी नेता नभाल्नीलाई उपचारका लागि जर्मनी लगियो

गम्भीर अवस्थामा रहेका रुसी विपक्षी नेता एलेक्सी नभाल्नीलाई उपचारका लागि साइवेरियाबाट जर्मनी लगिएको छ । हाल अचेत अवस्थामा रहेका उनलाई चियामा विष हालेर दिइएको उनका समर्थकहरूको आशङ्का छ । लगत्तै जर्मन चान्सलर एङ्गेला मेर्कलले नभाल्नीलाई आवश्यक पर्ने हरेक सहयोग गर्न आफ्नो देश तयार रहेको बताएकी थिइन् । ओम्स्कमा एलेक्सीको उपचारमा संलग्न रहेका चिकित्सकहरूले अन्यत्र लानका लागि उनी निकै बिरामी रहेको बताएका थिए । तर पछि उडानका लागि उनको अवस्था स्थिर रहेको उनीहरूले बताए । पत्नी युलीया उनीसँगै जर्मनी गएकी छिन् ।

जर्मनीको गैर सरकारी संस्था सिनेमा फर पीसले उनको उडानको खर्च बेहोर्दे छ । उनलाई बर्लिन लगिने छ । मस्को जाँदै गर्दा बिहीवार उनी बिरामी परेका थिए । लगत्तै उनी सवार विमानले आपत्कालीन अवतरण गरेको थियो । सामाजिक सञ्जालमा देखा परेका तस्बिरहरूमा उडान अघि विमानस्थलमा उनले एउटा कप मा केही पिउँदै गरेको देखिन्छ ।

उनको टोलीले त्यो चियामा विष हालिएको हुन सक्ने आशङ्का गरेका छन् । कोमामा रहेका उनको स्थिति स्थिर रहेको बताइएको छ । चिकित्सकहरूले उनको शरीरमा विष नपाइएको बताउँदै उनको त्यो अवस्था रगतमा चिनीको मात्रामा कमीका कारण भएको मेटाबोलिक डिसअर्डरले निम्ताएको हुन सक्ने सङ्केत गरेका छन् । त्यसपछि उनको छाला र कपालमा औद्योगिक रसायनको अंश पाइएको चिकित्सकहरूले सङ्केत गरे ।

रुसका राष्ट्रपति भ्लादिमिर पुटिनका खरो आलोचक नभाल्नीले सरकारी भ्रष्टाचारको भण्डाफोर गर्दै आएका थिए। ४४ वर्षीय नभाल्नी कैयौँ पटक जेल पनि परिसकेका छन् । उनले गत जुन महिनामा संविधान सुधारको निम्ति गरिएको मतदानलाई ’कु’ र संविधानको उल्लङ्घनको सङ्ज्ञा दिएका थिए ।