दक्षिण कोरियाको गिर्जाघरमा ठूलो संख्यामा कोरोना संक्रमित फेला
दक्षिण कोरियामा एकैदिन कोरोनाभाइरस सङ्क्रमण भएका २७९ मानिस फेला परेका छन् । पाँच महिनायता दैनिक वृद्धि भएको यो सर्वाधिक सङ्ख्या हो । तीमध्ये धेरै सङ्क्रमित साराङ जेइल गिर्जाघरसँग सम्बन्धित छन् ।
त्यहाँका पादरीलाई राष्ट्रपति मुन जेइनका प्रखर आलोचक मानिन्छ । यो वर्षको सुरुतिर शिन्जेओन्जी नामक अर्को गिर्जाघर कोरोनाभाइरसको सबैभन्दा ठूलो क्लस्टरका रूपमा देखा परेको थियो । उक्त विवादास्पद समूहसँग ५,२०० सङ्क्रमितहरूको सम्बन्ध रहेको बताइन्छ । आइतवार दक्षिण कोरियामा कोभिड १९ भएका २७९ जना फेला परेका हुन् ।
गत मार्च महिनापछि सङ्क्रमितहरूको सङ्ख्या २०० नाघेको पहिलो पटक हो । सोमवार १९७ सङ्क्रमित थपिएका छन् । नयाँ सङ्क्रमितहरूको सङ्ख्या लगातार चौथो दिन १०० भन्दा माथि रहेको छ ।
यो वृद्धिसँगै दक्षिण कोरियामा सङ्क्रमितहरूको सङ्ख्या १५ हजार ५१५ पुगेको छ । सङ्क्रमण भएका कम्तीमा ३१२ जना साराङ जेइल गिर्जाघरसँग सम्बन्धित भएको सोल महानगरले योन्हाप न्यूजलेलाई बताएको छ।
