भारतले छिट्टै कोरोनाविरुद्धको खोप उपलब्ध गराउँछः मोदी

भारतीय प्रधानमन्त्री नरेन्द्र मोदीले भारतले कोरोनाविरुद्ध तीन तीन वटा खोप निर्माण गरिरहेको बताएका छन् । शनिबार नयाँदिल्लीस्थित लालकिलामा ७४औं भारतीय स्वतन्त्रता दिवसको अवसरमा आयोजित कार्यक्रमलाई सम्बोधन गर्दै मोदीले भारतले छिट्टै कोरोनाविरुद्धको खोप उपलब्ध गराउने बताएका हुन् ।

उनले भने,‘भारतले एउटा हैन तीन तीन वटा खोपको परीक्षण गरिरहेको छ । अनुमति पाउनासाथ व्यापकरुपमा खोप उत्पादन गरिनेछ ।’

उनले नेसनल डिजिटल हेल्थ मिसनको सुरुवात गरिने उल्लेख गर्दैसबै नागरिकलाई हेल्थ आइडी उपलब्ध गराइने बताए । उनले कोरोनाका कारण लाखौं मानिस प्रभावित भएका भन्दै छिट्टै भारतले कोरोनाबाट विजय प्राप्त गर्ने बताए । उनले कोरोना महामारी नियन्त्रणका लागि सरकारलाई साथ दिन नागरिकलाई आग्रह गरे ।