कोरोना संक्रमणबाट भारतमा ४६ हजारको मृत्यु, २३ लाख भन्दा बढी संक्रमित
विश्वभर महामारीको रुपमा फैलिएको कोरोना भाइरस संक्रमणका कारण मृत्यु हुनेको संख्या ७ लाख ४५ हजार नाघेको छ ।
विश्वका २ सय १६ देशमा फैलिएको कोरोनाका कारण विश्वभर २ करोड ५ लाख २२ हजार १ सय ९१ जना संक्रमित भएका छन् भने ७ लाख ४५ हजार ९ सय २७ जनाको मृत्यु भएको छ ।
यस्तै, १ करोड ३४ लाख ४१ हजार ९ सय १३ उपचारपछि निको भएर घर फर्किएका छन् । संक्रमितमध्ये ६३ लाख ३४ हजार ३ सय ५१ जना विभिन्न अस्पतालमा उपचार भइरहेको छ भने ६४ हजार ६ सय बढीको अवस्था गम्भीर रहेको वल्डोमिटरमा उल्लेख छ ।
चीनको वुहानबाट गत डिसेम्बर अन्त्यबाट सुरु भएको कोरोना संक्रमणका कारण सबैभन्दा बढी प्रभावित अमेरिकामा संक्रमितको संख्या ५३ लाख ५ हजार ९ सय ५७ पुगेको छ । कोरोना संक्रमणका कारण १ लाख ६७ हजार ७ सय भन्दा बढीको मृत्यु भएको छ भने २७ लाख ५५ हजार ३ सय भन्दा बढी निको भएका छन् ।
यस्तै, ब्राजिलमा ३१ लाख १२ हजार ३ सय भन्दाबढी संक्रमित भएका छन् भने १ लाख ३ हजार बढीको मृत्यु भएको छ । संक्रमितमध्ये २२ लाख ४३ हजार १ सय भन्दाबढी निको भएका छन् ।
यसैगरी छिमेकी मुलुक भारतमा २३ लाख २८ हजार ४ सय भन्दाबढी संक्रमित भएका छन् । संक्रमितमध्ये ४६ हजार १ सयबढीको मृत्यु भईसकेको छ भने १६ लाख ३८ हजार १ सय भन्दाबढी निको भएका छन् ।
