भारतमा कोरोना संक्रमणबाट एकै दिन विश्वभरिकै सर्वाधिक व्यक्तिको मृत्यु
भारतमा सोमबार ८०३ जनाको कोरोनाभाइरस सङ्क्रमणका कारण मृत्यु भएको छ । उक्त सङ्ख्या विगत २४ घण्टाको अवधिमा विश्वभरि कुनै पनि देशमा मृत्यु भएका व्यक्तिको सर्वाधिक सङ्ख्या हो ।
सो अवधिमा भारतमा अन्यत्रको भन्दा सर्वाधिक सङ्ख्यामा सङ्क्रमितहरू फेला परेका थिए । मङ्गलवार बिहान सार्वजनिक गरिएको तथ्याङ्कमा भारतमा सोमबार ५२ हजार ५० जनामा कोभिड १९ पुष्टि भएको उल्लेख छ ।
यो वृद्धिसँगै भारतको स्वास्थ्य मन्त्रालयका अनुसार भारतमा अहिले सङ्क्रमितको कुल सङ्ख्या १८ लाख ५५ हजार ७४६ पुगेको छ । तीमध्ये ३८ हजार ९३८ जनाको मृत्यु भइसकेको छ । भारतमा विगत छ दिनदेखि प्रत्येक दिन ५० हजार भन्दा बढी मानिसमा कोरोनाभाइरस सङ्क्रमण पुष्टि भएको छ।
भारतमा महाराष्ट्र राज्य सबैभन्दा नराम्ररी प्रभावित भएको छ । १५ दिनदेखि सङ्क्रमणको दर ह्वात्तै बढिरहेको तथ्याङ्कले देखाउँछ । तर भारत सरकारले बिरामीहरू निको हुने दर अन्य देशको तुलनामा राम्रो भएको तर्क गरेको छ । अहिलेसम्म १२ लाख ३० हजार ५०९ जना निको भएको बताइन्छ ।
