वेलायतमा डेढ घण्टामै कोरोनाको रिपोर्ट दिने परीक्षण विधि सुरु गरिने
नमुना सङ्कलन गरेको ९० मिनेटमै नतिजा आउने नयाँ ’जीवन रक्षक’ कोरोनाभाइरस परीक्षण विधि वेलायतमामा आगामी साताबाट सुरु गरिने भएको छ । कोभिड १९ र अन्य मौसमी बिरामीबीच छुट्याउन सकिने त्यस्तो स्वाब र डीएनए परीक्षण जाडो याममा निकै उपयोगी हुने ब्रिटेनका स्वास्थ्यमन्त्रीले बताएका छन् ।
हालको परीक्षण प्रकृया अन्तर्गत तीन चौथाइ नतिजा २४ घण्टाभित्रै आइसक्ने भएपनि एक चौथाइ नतिजाका लागि दुई दिनसम्म लाग्न सक्छ । सो परीक्षणको पाँच लाख किट वेलायतका वृद्ध हेरचाह केन्द्र र परीक्षण केन्द्रमा आगामी साता उपलब्ध हुनेछ। यो वर्ष थप लाखौँ त्यस्ता किट बनाइने बताइएको छ । स्वास्थ्यमन्त्री म्याट ह्यान्ककले कोरोनाभाइरस परीक्षणसम्बन्धी यो नयाँ विकसित प्रविधि जीवन रक्षक हुने पनि बताए ।
यो परीक्षणका लागि मेशिन निर्माण गरेको कम्पनी डीएनए नजका सहसंस्थापक प्राध्यापक क्रिस टुमाजुले नयाँ परीक्षण द्रूत र विश्वसनीय रहेको भन्दै यो जुनसुकै स्थानमा लगेर गर्न सकिने बताए । परीक्षण किट बनाएको अक्सफोर्ड नानोपोरका प्रमुख कार्यकारी गोर्डन साङ्घेराले यो परीक्षण विश्वभरका लागि सस्तो र सहज परीक्षण हुने सम्भावना रहेको बताए ।