अमेरिकी विश्वविद्यालयबाट ह्याकरले यसरी लगे १३ करोड रुपैयाँ
कोभिड १९ को उपचार पत्ता लगाउन कार्यरत एउटा अग्रणी चिकित्सा अनुसन्धान केन्द्रले ह्याकरहरूलाई करिब १३ करोड ४२ लाख रुपैयाँ तिरेको स्वीकार गरेको छ । बीबीसी न्यूजले युनिभर्सिटी अफ क्यालिफोर्निया सान फ्रान्सिस्को र ह्याकरबीचको सम्वाद प्राप्त गरेपछि केन्द्रले सो कुरा स्वीकार गरेको हो ।
नेटवाकर आपराधिक समूहले जुन १ तारिखमा त्यहाँ आक्रमण गरेका थिए र त्यो साइबर आक्रमणबाट जोगाउन सूचना प्रविधिसम्बन्धी कर्मचारीले सबै कम्प्युटर बन्द गरेका थिए । एउटा बेनामे स्रोतबाट प्राप्त सूचनाका आधारमा बीबीसी न्यूज फिरौतीबारे इन्टरनेटमा गरिएको गोप्य कुराकानीसम्म पुगेको थियो ।
साइबर सुरक्षा विज्ञहरूका अनुसार यस्ता किसिमका घटना विश्वभर नै भइरहेको छ । ह्याकरहरूलाई पैसा नतिर्न अमेरिकी र ब्रिटिश अनुसन्धारत संस्थाहरूले भने पनि त्यसको पूर्ण पालना नभएको बताइन्छ ।
आफ्नो सफ्टवेयरको निःशुल्क नमुना र प्रत्यक्ष कुराकानीको समेत सुविधा भएको वेबसाइटमा समय घर्किदै गएको सङ्केत गर्ने ’काउन्टडाउन टाइमर’ हुन्छ जसअनुसार तोकिएको समयमा फिरौती नतिरे रकम दोब्बर गरिन्छ वा कम्प्युटरका तथ्याङ्कहरू मेटिन्छ । ह्याक गरिएको कम्प्युटर वा इमेल वा अन्य विधिबाट ह्याकरहरूसँग कुरा गर्न मिल्ने बनाइएको हुन्छ ।
नेटवाकरले मात्रै पछिल्लो दुई महिनामा अन्य दुई विश्वविद्यालयमा आक्रमण गरेको बुझिएको छ । आक्रमणपछि देखिने गृहपृष्ठ झट्ट हेर्दा ग्राहक सेवाका लागि तयार पारिएको वेबसाइट जस्तो देखिन्छ ।