इमरान खानले बिन लादेनलाई शहीद भनेपछि…..
पाकिस्तानका प्रधानमन्त्री इमरान खानले आतङ्कवादी सङ्गठन अलकायदाका संस्थापक नेता ओसामा बिन लादेनलाई शहीदको सङ्ज्ञा दिएपछि उनको चर्को आलोचना भएको छ । बिहीवार संसद्मा सम्बोधन गर्दै खानले पाकिस्तानमा आएर अमेरिकी सेनाले बिन लादेनको हत्या गर्नु आफ्ना लागि लज्जास्पद विषय भएको बताएका थिए ।
त्यही प्रसङ्गमा उनले बिन लादेनलाई अमेरिकाले शहीद बनाइदिएको टिप्पणी गरेका थिए । अमेरिकाले सन् २००१ सेप्टेम्बर ११ तारिखमा भएका आतङ्कवादी आक्रमणहरूको योजनाकार बिन लादेनलाई मानेको थियो । योभन्दा ठूलो अपमान अरू के हुन्छ भन्ने प्रश्न गर्दै उनले अमेरिका र पाकिस्तानको सम्बन्धबारे प्रश्न गरे ।
सन् २०११ मा भएको एउटा नाटकीय र गुप्त सैन्य कारबाहीमा अमेरिकाले उनलाई मारिदिएको थियो । खानको सम्बोधनपछि विपक्षी दलहरूले खानको आलोचना गरेका छन् ।
पाकिस्तान पीपल्स पार्टीका अध्यक्ष बिलावल भुट्टो जर्दारीले खानको भनाइ उनको हिंसक अतिवादलाई खुसी बनाउने विगत सँग मिलेको भन्दै कटाक्ष गरेका छन् । विपक्षी सांसद ख्वाजा मोहम्मद आसिफले “पाकिस्तानमा आतङ्कवाद भित्र्याउने“ बिन लादेनलाई शहीद भनेकोमा संसद्मै आपत्ति प्रकट गरे ।
