पाकिस्तानमा विमान दुर्घटना मानवीय त्रुटीका कारण
पाकिस्तानमा गरिएको एउटा अनुसन्धानले गत महिना ९७ जनाको ज्यान जाने गरी भएको पाकिस्तान इन्टरनेशनल एयरलाइन्स (पीआईए)को जहाज दुर्घटनामा मानवीय गल्तीलाई जिम्मेवार ठहर्याएको छ ।
उड्डयन मन्त्री गुलाम सर्वार खानले संसदलाई त्यसबारे जानकारी दिँदै पाइलट र हवाई नियन्त्रकले उड्डयन मापदण्ड पालना नगरेको बताए । उनका अनुसार कोरोनाभाइरसबारेको कुराकानीका कारण पाइलटको ध्यान अन्यत्र मोडिएको थियो । २२ मेमा भएको उक्त दुर्घटनामा दुईजना यात्रु मात्र बाँच्न सकेका थिए । निकै उचाइमा उडान गरिरहेका पाइलटले अवतरण गियर प्रयोग नगरेको र इन्जिनमा समस्या आएको जानकारी टावरलाई दिन विफल भएको मन्त्री खानको भनाइ थियो ।
उनले एयरबस ए३२० विमानमा कुनै खराबी नरहेको भन्दै पहिलो अवतरण प्रयासमा ’ल्यान्डिङ गियर’ राम्ररी खोल्न नसकेको र त्यसकै कारण पुनस् उड्नुअघि छुस्स जमिनमा छोएको बताए । दोस्रो अवतरणको क्रममा हवाई नियन्त्रकहरूले पाइलटलाई इन्जिन नराम्ररी बिग्रिएकोबारे जानकारी दिन चुकेको उनको भनाइ थियो ।