गलवान उपत्यकाको स्वामित्वमा चिनियाँ दाबी भारतद्वारा अस्वीकार
चीन र भारतका सैनिकबीच झडप भएको गलवान उपत्यकामा आफ्नो स्वामित्व भएको चीनको दाबीलाई भारतले अस्वीकार गरेको छ । सोमबार राति त्यहाँ भारतीय र चिनियाँ सैनिकबीचको भएको झडपमा कम्तीमा २० भारतीय सैनिकको मृत्यु भएको थियो । उक्त घटनापछि दुई एशियाली शक्तिबीच तनाव चर्किएको छ ।
भारतीय विदेश मन्त्रालयले गलवान क्षेत्रमा चीनको दाबीलाई ’अतिरञ्जित र समर्थन गर्न नसकिने’ भएको बताएको छ । दुवै पक्षले विकट हिमाली क्षेत्रको विवादास्पद सीमामा भएको घटनाका सम्बन्धमा आ आफ्नो विरोध जनाइसकेका छन् । चीनले आफ्नो क्षतिका बारेमा बताएको छैन तर भारतीय सञ्चारमाध्यमहरूले कम्तीमा ४० चिनियाँ सैनिकको ज्यान गएको दाबी गरेका छन् ।
भारतका केही सैनिकहरू हराइरहेको बताइएको छ । बुधवार चीनले एउटा सैन्य विज्ञप्तिलाई इङ्गित गर्दै गलवान उपत्यका आफ्नो भएको बताएको छ । भारतीय विदेश मन्त्रालयका प्रवक्ता अनुराग श्रीवास्तवले दुवै देशका विदेशमन्त्रीहरूले फोनवार्ता गरेका र ’स्थितिलाई जिम्मेवार तरिकाले व्यवस्थापन गर्न सहमत भएको’ बताएका छन् ।
प्रेस ट्रस्ट अफ इन्डियाले श्रीवास्तवले ’अतिरञ्जित र अस्वीकार्य दाबी सहमतिविपरीत भएको’ बताएको उल्लेख गरेको छ । दुई देशका विदेशमन्त्रीको वार्तापछि जारी प्रेस विज्ञप्तिमा भारतले चीनले रणनीतिक रूपमा महत्त्वपूर्ण गलवान उपत्यकाको सीमामा चीनले निर्माण गर्न प्रयास गरेपछि सङ्घर्ष भएको दाबी गरेको छ ।
भारतले त्यसलाई ’हिंसा र मानवीय क्षतिका लागि जिम्मेवार योजनाबद्ध कार्य’ भन्दै चीनलाई यसलाई सच्याउन भनेको छ । चीनले घटनाका सम्बन्धमा विरोध जनाउँदै भारतलाई विस्तृत अनुसन्धान गर्न र यस्ता घटना दोहोरिन नदिन उत्तेजित बनाउने कार्य नगर्न आग्रह गरेको छ ।