उत्तर कोरियाद्वारा दक्षिणसँग मिलेर गेसङमा बनाइको संयुक्त सम्पर्क कार्यालय ध्वस्त
उत्तर कोरियाले दक्षिण कोरियासँग मिलेर सीमावर्ती सहर गेसङमा बनाइको एउटा संयुक्त सम्पर्क कार्यालय ध्वस्त बनाएको दुवै देशहरूले पुष्टि गरेका छन् । उत्तर कोरियाको सेनाले दुई देशलाई विभाजन गर्ने असैनिकीकृत क्षेत्र (डीएमजी) प्रवेश गर्न तयार भएको चेतावनी दिएको केही घण्टापछि उक्त घटना भएको हो । उत्तर कोरियाली भूमिमा रहेको उक्त कार्यालय दुई देशबीच संवादका लागि सन् २०१८ मा स्थापना गरिएको थियो ।
कोभिड १९ का कारण लगाइएका प्रतिबन्धका कारण उक्त कार्यालय जनवरी महिनादेखि बन्द थियो । यसअघि उत्तर कोरियाबाट भागेर दक्षिण कोरियामा आश्रय लिइरहेका मानिसहरूको समूहले उत्तरतर्फ सङ्गठित रूपमा प्रचारात्मक सामग्री पठाइएको प्रत्युत्तरस्वरूप प्योङ्याङले डीएमजीमा सैनिक पठाउने चेतावनी दिएको थियो ।
सप्ताहान्तमा उत्तर कोरियाली नेता किम जङ उनकी बहिनी किम यो जङले त्यस्तो कदमका लागि तयार रहन आदेश दिएको बताएकी थिइन् । यतिखेर सेनाले आफ्ना ‘अग्रमोर्चालाई किल्लाको रूपमा बदल्न र सैन्य निगरानीलाई बढाउन’ तयार रहेको बताएको छ । असैनिकीकृत क्षेत्र सन् १९५० को दशकमा भएको कोरियाली युद्धपछि कोरियाको सीमारेखा हो ।
केही समययता दुई देशबीच खासगरी बेलुनमार्फत् सीमापारि पठाइने पर्चाका कारण तनाव चुलिएको छ । त्यो गतिविधिबाट क्रुद्ध बनेको प्योङ्याङले गत साता दुई देशका नेताहरूबीच स्थापित हटलाइन सेवासहित दक्षिण कोरियासँगका सबै सम्पर्क सञ्जालहरू बन्द गरेको थियो ।
दक्षिण कोरियाको रक्षा मन्त्रालयले मङ्गलवार विकसित पछिल्ला घटनाक्रमबारे प्रतिक्रिया व्यक्त गर्दै अमेरिकासँग मिलेर उत्तर कोरियाको सैन्य गतिविधि नियालिरहेको जनाएको छ । मङ्गलवार उत्तर कोरियाली सेनाले असैनिकीकृत क्षेत्रमा सेना पठाउने कार्ययोजनाको अध्ययन गरिरहेको जनाएको छ ।