सर्वोच्चको आदेशपछि ब्राजिलमा कोरोना संक्रमितको तथ्यांक राख्न सुरु
ब्राजिलले कोरोना भाइरस संक्रमित र त्यसबाट मृत्यु हुनेको तथ्यांक पुनः राख्न सुरु गरेको छ । मंगलबार सर्वोच्च अदालतले सरकारलाई कोरोना भाइरसको तथ्यांक पारदर्शी ढंगले सार्वजनिक गर्न आदेश दिएको थियो । दुई दिनअघि ब्राजिलको स्वास्थ्य मन्त्रालयको आधिकारिक वेबसाइटबाट कोरोना बिरामीसँग सम्बन्धित तथ्यांक हटाइएको थियो ।
यो घटनालाई लिएर ब्राजिलको आलोचना भइरहेको थियो । ब्राजिलको स्वास्थ्य विभागले तथ्यांक हटाउनुका साथै आगामी दिनमा कोरोना भाइरस संक्रमितको तथ्यांक जारी नगर्ने घोषणा गरेको थियो ।
तर सर्वोच्च अदालतले मन्त्रालयलाई पुनः तथ्यांक जोड्न आदेश दिएको थियो । सर्वोच्च अदालतका न्यायाधीशले आदेश सुनाउँदै सरकारको कदमले कोरोना भाइरसको निगरानीलाई असम्भव बनाइदिएको बताए । विश्व स्वास्थ्य संगठन (डब्लुएचओ) ले पनि ब्राजिललाई कोरोना भाइरस संक्रमितको तथ्यांक पारदर्शी रुपमा सार्वजनिक गर्न अपिल गरेको थियो ।
