चीनमा पछिल्लो २४ घण्टामा शून्य संक्रमण
चीनमा गत डिसेम्बरमा कोरोनाभाइरस सङ्क्रमण फैलिएयता पहिलो पटक शुक्रवार २४ घण्टामा कुनै नयाँ सङ्क्रमित भेटिएन । त्यहाँको नेशनल हेल्थ कमिशनले गएको २४ घण्टामा कोभिड१९ का कारण कसैको पनि मृत्यु नभएको जनाएको छ ।
चिनियाँ शहर वुहानमा पहिलो सङ्क्रमण पुष्टि भएयता संसारभर ५० लाख मानिसहरू सङ्क्रमित भएका छन् भने ३ लाख ३८ हजार जनाको मृत्यु भएको छ । चीनमा मात्रै ८४ हजार भन्दा बढी सङ्क्रमित भएक र ४ हजार ६०० जनाको मृत्यु भएको छ । वुहानको हुबेमा सरकारले गरेको कडा लकडाउनका कारण कोरोनाभाइरस चीनको अन्य भागमा धेरै फैलिन नपाएको बताइन्छ ।
विश्व स्वास्थ्य सङ्गठनले शुक्रवार दक्षिण अमेरिका महामारीको नयाँ केन्द्रविन्दु बनेको बताएको छ । ब्रजिल र मेक्सिकोमा हालैमा दिनमा नयाँ सङ्क्रमण ह्वात्तै बढेको छ । ब्रजिलमा ३ लाख ३० हजार भन्दा बढी सङ्क्रमण पुष्टि भएको छ जुन विश्वमै अमेरिका पछि सबैभन्दा बढी सङ्क्रमण भएको देश हो ।
