३१ मेसम्म लकडाउन थप गर्ने भारत सरकारको निर्णय

भारत सरकारले कोरोना भाइरसको नियन्त्रणका लागि लकडाउनको अवधि ३१ मेसम्म थपेको छ । भारतको गृह मन्त्रालयले गत २४ मार्चदेखि लागू गरिएको लकडाउनलाई थप १४ दिनका लागि बढाउने निर्णय गरेको हो । गत ४ मेदेखि गरिएको तेस्रो चरणको लकडाउनको अवधि १७ मे मा पूरा भएको छ । विगत केही दिनयता भारतभरि नै कोरोना भाइरसको संक्रमितको संख्यामा वृद्धि देखिएपछि चौथो चरणको लकडाउन गर्ने निर्णय गरिएको हो ।

भारतीय प्रधानमन्त्री नरेन्द्र मोदीले गत शुक्रवार भिडियो कन्फरेन्समार्फत् विभिन्न राज्यका मुख्यमन्त्रीहरुसँग लकडाउन थप्ने वा नथप्ने सम्बन्धमा छलफल गरेका थिए । धेरैजसो मुख्यमन्त्रीहरुले संक्रमणको जोखिम कम नभएको हुँदा आर्थिक गतिविधिलाई क्रमशः सुचारु पार्दै लकडाउनलाई निरन्तता दिनुपर्ने सुझाव दिएका थिए । मुख्यमन्त्रीहरु दिएको तिनै सुझावका आधारमा लकडाउन लम्बाउने निर्णय गरिएको हो ।