खोप नबने पनि देशलाई पुरानो अवस्थामा फर्काउने अमेरिकी राष्ट्रपति ट्रम्पको उद्घोष

अमेरिकाले यो वर्षको अन्त्यसम्ममा कोरोनाभाइरसविरुद्ध खोप बनाउने उद्देश्य राखेको घोषणा गर्दै राष्ट्रपति डोनल्ड ट्रम्पले ’खोप भए पनि नभए पनि’ अमेरिका खुला रहने वाचा गरेका छन् । ’अपरेशन वोर्प स्पीड’ नाम दिइएको यो योजनालाई उनले दोस्रो विश्वयुद्धका बेला परमाणुअस्त्र बनाउने प्रयाससँग तुलना गरे ।

तर उनले खोप बनेन भने पनि अमेरिकीहरूले बिस्तारै सामान्य अवस्थामा फर्किनुपर्ने स्पष्ट पारेका छन् । धेरै विशेषज्ञहरूले एकै वर्षमा कोरोनाभाइरसको खोप बन्न सक्ने विषयमा विश्वस्त छैनन् । उनले भने, ‘यो पूर्ण रूपमा खोपमा मात्रै निर्भर छ भन्ने कुरा मानिसहरूले नसोचून् भन्ने म चाहन्छु ।’

जोन्स हप्किन्स विश्वविद्यालयका अनुसार कोरोनाभाइरसको सङ्क्रमणका कारण विश्वभरि ज्यान गुमाउनेहरूको सङ्ख्या तीन लाख नाघेको छ । विश्वभरि सङ्क्रमितहरूको सङ्ख्या ४५ लाख ४२ हजार भन्दा बढी छ ।

निको हुनेहरूको सङ्ख्या शुक्रवार नै १५ लाखभन्दा बढी थियो । पछिल्लो तथ्याङ्कअनुसार सबैभन्दा बढी सङ्क्रमित अमेरिकामा छन् । अहिलेसम्म १४ लाख ४२ हजार भन्दा बढी सङ्क्रमित रहेको अमेरिकामा ज्यान गुमाउनेहरूको सङ्ख्या ८७ हजार नाघेको छ । अमेरिकामा अतिप्रभावित न्यूयोर्क राज्यमा २८ हजार भन्दा बढीको मृत्यु भएको छ ।