आफ्नो प्रशासनले चीनबारे अनुसन्धान गरिरहेको ट्रम्पको भनाई
अमेरिकी राष्ट्रपति डोनल्ड ट्रम्पले कोरोनाभाइरस फैलाउन केवल चीनको भूमिका भएको आरोप लगाउँदै आफ्नो प्रशासनले चीनबारे अनुसन्धान गरिरहेको बताएका छन् । ह्वाइट हाउसमा आयोजित पत्रकार सम्मेलनमा अमेरिकी राष्ट्रपति ट्रम्पले कोरोनाभाइरस रोकथामका लागि चीनले चालेको कदमबारे आफ्नो प्रशासनले अत्यन्त गम्भीर ढङ्गले चीनमाथि अनुसन्धान गरिरहेको बताएका छन् । ट्रम्पले आफूहरू चीनसँग अप्रसन्न रहेको बताए ।
कोरोनाभाइरस महामारीको विषयमा ट्रम्पले चीनको वारम्वार आलोचना गर्दै आएका छन् । ट्रम्पले चीनतर्फ लक्षित गर्दै कोरोनाभाइरस महामारी फैलिनुमा एउटा देशबाहेक अरू कसैलाई पनि जिम्मेवार ठहर्याउन नसकिने बताए ।
कोभिड १९ रोक्न चीन पूर्णतः असफल भएको ट्रम्पको दाबी छ । ट्रम्पले आफूले अर्थतन्त्रलाई इतिहासमै सर्वोच्च तहमा पुर्याएको तर त्यसलाई बन्द गर्न दबावमा परेको पनि बताए । उनले परीक्षणहरू बढाउने योजना पनि सार्वजनिक गरेका छन् । अमेरिकामा ५५ हजार जनाभन्दा बढीले कोरोनाभाइरसका कारण ज्यान गुमाइसकेका छन् ।
