चीनमा होटल भत्किंदा चार जनाको मृत्यु, २९ जना भग्नावशेषमा बेपत्ता
दक्षिणी चीनको फुजिएन प्रान्तमा कोरोनाभाइरस सङ्क्रमण भएका व्यक्तिहरूको सम्पर्कमा आएका मानिसलाई क्वारन्टीनमा राख्न प्रयोग गरिएको एउटा होटल भत्किँदा कम्तीमा चार जनाको मृत्यु भएको छ भने २९ जना अझै हराइरहेका छन् । च्वान्जू नगरस्थित उक्त पाँचतले होटल शनिवार राति भत्किँदा भग्नावशेषमा ७१ जना फसेका थिए ।
उद्धारकर्मीहरूले अहिले पनि भग्नावशेषमा खोजी गरिरहेका छन् । आपत्कालीन व्यवस्थापन हेर्ने मन्त्रालयका अनुसार ३८ जनाको उद्धार गरिएको छ । यसअघि फसेकामध्ये ४७ जनालाई बाहिर निकालिएको थियो । भवन भत्किनुको कारण अझै स्पष्ट भएको छैन ।
कोरोनाभाइरस सङ्क्रमण नियन्त्रण गर्ने उद्देश्यले सङ्क्रमित व्यक्तिहरूसँग प्रत्यक्ष सम्पर्कमा आएका तिनका आफन्तलाई त्यहाँ अलग्गै निगरानीमा राखिएको थियो । उक्त होटल सन् २०१८ मा खुलेको र त्यसमा ८० वटा अतिथिकक्ष भएको बताइन्छ ।