यहुदीहरू लक्षित छुरा प्रहारबाट न्यूयोर्कमा धेरै घाइते

अमेरिकी राज्य न्यूयोर्कमा यहुदीहरूको एक प्रार्थनासभा नजिकैको घरमा थुप्रै मानिसहरूमाथि छुरा प्रहार गरिएको विवरणहरूमा जनाइएको छ।

न्यूयोर्क शहरको उत्तरमा रहेको मोन्सेमा अवस्थित उक्त घर एकजना यहुदी धर्मगुरुको रहेको अर्थोडक्स जुईस पब्लिक अफेयर्स काउन्सील (जेपीएसी)ले जनाएको छ।

कम्तीमा पाँचजना घाइतेलाई अस्पताल पुर्‍याइएको उक्त काउन्सिलले जनाएको छ। ती सबै यहुदीहरू छन्। उनीहरू त्यहाँ खानुखा भनिने यहुदीहरूको एक पर्वको उत्सव मनाउन जुटेका थिए।

हमलाको उद्धेश्य अझै खुलिसकेको छैन र हमलाकारीको पक्राउबारे समेत तत्काल केही स्पष्ट हुन सकेको छैन। न्यूयोर्क प्रहरीको प्रतिआतङ्कवाद एकाईले उक्त क्षेत्रमा खोजतलासी गरिरहेको र घटनालाई नजिकबाट नियालेको बताइएको छ।