मानवतस्करी गर्न ‘रुस र फिनल्यान्डको नक्कली सीमा’



रुसमा एक व्यक्तिलाई नक्कली सीमा चौकी बनाएर मानवतस्करी गर्न खोजेको आरोपमा पक्राउ गरिएको छ। चार आप्रवासीलाई फिनल्यान्ड पुगेको आभास गराउन उनले नक्कली चौकी बनाएको बताइएको छ। त्यहाँ पुगेपछि ती चार जनाले आफू युरोपेली सङ्घअन्तर्गत रहेको देश फिनल्यान्ड आइपुगेको भन्ठानेका थिए।

तर उनीहरूलाई सीमावर्ती भीबोर्ग नगरस्थित दलदल भएको एउटा जङ्गलमा छोडेर ती व्यक्ति एक्लै हिँडेका थिए। रुस र फिनल्यान्डबीच १,३४० किलोमिटर लामो सीमा छ।

फिनल्यान्ड जान खोज्ने आप्रवासीहरू दक्षिण एशियाली भएको बुझिएको छ। तर उनीहरू कुन देशका नागरिक हुन् त्यो खुलाइएको छैन।

रुसी सुरक्षाकर्मीले फेला पारेपछि ती चार आप्रवासीले बल्ल आफू अझै रुसी भूमिमै भएको थाहा पाए। ती सन्दिग्ध मानवतस्करले प्रत्येक व्यक्तिसँग ११,००० डलरभन्दा बढी रकम लिएको बताइएको छ

रुसी सुरक्षानिकायले चार आप्रवासीसहित उनलाई नोभेम्बर २८ मा नियन्त्रणमा लिएको थियो। बुधवार सेन्ट पिटर्सबर्गको एउटा अदालतले अध्यागमनसम्बन्धी नियम उल्लङ्घन गरेको ठहर गर्दै ती चार जनालाई जरिबाना गरेको थियो।

मानवतस्करीको आरोप लागेका व्यक्तिलाई जालसाजीसम्बन्धी गम्भीर अभियोग लगाइएको छ। उनी हिरासतमा छन्। उनको मुद्दामा सुनुवाइ हुन बाँकी नै छ।

रुसी सामाजिक सञ्जालमा प्रेषित भिडिओमा ती व्यक्तिहरूलाई पक्राउ गरिएको देखिन्छ। उनीहरूलाई जङ्गलको अँध्यारोमा हात उठाएर उभिएको देखिन्छ। भिडिओमा एफएसबी भनिने सुरक्षा निकायका अधिकारीहरूले उनीहरूमा टर्च बालेर प्रकाश पारिरहेको देखिन्छ।

यो खबर पढेर तपाईलाई कस्तो महसुस भयो ?

प्रतिक्रिया दिनुहोस
बाइडेनद्वारा बन्दुक नियन्त्रण विधेयकमा हस्ताक्षर

राष्ट्रपति जो बाइडेनले शनिबार बन्दुक नियन्त्रण कानुनमा हस्ताक्षर गरेका छन् । दशकौंको बहसपछि

मृत्युदण्डको माग गरिएका कुरेरिसलाई किन छाडियो जेलबाट ?

सरकारविरोधी प्रदर्शनमा सहभागी भएको आशङ्कामा १३ वर्षको उमेरमै पक्राउ परेका एक कैदीलाई साउदी

सर्वोच्चको आदेशपछि अमेरिकामा धमाधम बन्द हुँदै गर्भपतन गराउने क्लिनिक

अमेरिकाको सर्वोच्च अदालतले महिलाले गर्भपतन गर्न पाउने सम्बन्धी संवैधानिक अधिकार समाप्त हुने फैसला

ओस्लो नाइटक्लबमा अन्धाधुन्ध गोली चल्दा दुईजनाको मृत्यु

नर्वेको एक नाइटक्लबमा अन्धाधुन्ध गोली चल्दा दुई जनाको मृत्यु भएको छ भने कैयौँ