काबुलको सैनिक केन्द्रमा ग्रिनेड आक्रमण, पाँच जना घाइते
अफगानिस्तानको राजधानी काबुलमा सोमबार बिहान सैनिक तालिम केन्द्रको प्रवेशद्वारमा दुई वटा ग्रिनेड प्रहार गरिएको छ । अज्ञात समूहले गरेको उक्त आक्रमणबाट कम्तीमा चार जना अफगान सैनिक र एक जना सर्वसाधारण घाइते भएका छन् ।
गृह मन्त्रालयका प्रवक्ता नसत राहिमीले शुरुमा आत्मघाती हमलाको शंका गरिए पनि अनुसन्धानबाट दुई वटा हाते ग्रिनेड फालेको पत्ता लागेको जानकारी दिए । उक्त घटनाको कुनै पनि समूहले जिम्मेवारी लिएको छैन ।
अफगानिस्तानका विद्रोही समूहहरु तालिबान र इस्लामिक स्टेटले अफगान सैनिक र सरकारी कार्यालयलाई लक्षित गरी नियमित रुपमा आक्रमण गरिरहेका छन् ।
काबुलमा केही दिन अघिमात्र सुरक्षा कार्यालयलाई लक्षित गरी भएको आत्मघाती आक्रमणमा १२ जनाको मृत्यु भएको थियो ।
