जष्ट जोन नाइजेरिया कटारी गोल्डकपको फाइनलमा

कटारी । नाइजेरियन क्लब जष्ट जोन उदयपुरको कटारीमा जारी छैटौँ कटारी अन्तरराष्ट्रिय आमन्त्रित मेयर गोल्डकप ‘नकाउट फुटबल प्रतियोगिता’को फाइनलमा प्रवेश गरेको छ ।

बिहीबार भएको सेमिफाइनल खेलमा जष्ट जोनले टाइब्रेकरमा साविक उपविजेता शहलेस फुटबल क्लब, सिरहालाई ४–३ गोल अन्तरले पराजित गर्दै फाइनलमा स्थान बनाएको हो । निर्धारित खेल अवधिमा दुवै टोलीले १–१ गोलको बराबरी खेलेपछि टाइब्रेकरबाट नतिजा निकालिएको हो ।

खेलको निर्धारित समयमा शहलेसका लागि खेलको दुई मिनेटमै राज भुसालले गोल गरेर अग्रता दिलाए । तर खेलको २६औँ मिनेटमा जष्ट जोनका लागि डेमोला हमजादले गोल गरेर बराबरी गरे । त्यसपछि दुवै टोलीबाट गोल हुन सकेन ।

टाइब्रेकरमा जष्ट जोनका लागि अबमल्हा हमजाद, सुनकनाल सोयन्का, फेमी एडेसिना र ओलाए डेभिसले गोल गरे । शहलेसका लागि अनील पाँचेमगर, अजित चौधरी र निश्चल लामाले गोल गरेका थिए । शहलेसका विदेशी (नाइजेरियन) खेलाडी एनिसेट र सुशील यादवको वललाई जष्ट जोनका गोलरक्षक डोडो अलुले रोके ।

खेलको म्यान अफ दी म्याच जष्ट जोनका गोलरक्षक अलु घोषित भए । उनलाई आयोजक कटारी नगर खेलकुद विकास समितिका उपाध्यक्ष राजकुमार थापा क्षेत्रीले रु पाँच हजारका साथमा ट्रफी र मेडल प्रदान गरे ।

प्रतियोगिताको विजेताले रु पाँच लाख तथा उपविजेताले रु तीन लाखका साथमा ट्रफी, मेडल र प्रमाणपत्र प्राप्त गर्नेछन् । उपाधिका लागि यही वैशाख ५ गते जष्ट जोनले चात्यासा फुटबल क्लब, झापासँग प्रतिस्पर्धा गर्नेछ ।

चात्यासा फुटबल क्लबले बुधबार सेमिफाइनलमा आयोजक कटारी–११ लाई ३–० गोल अन्तरले पराजित गर्दै फाइनलमा स्थान सुरक्षित गरिसकेको छ । प्रतियोगितामा आमन्त्रित नाइजेरियाको जष्ट जोन र भारतको रिभर दी स्पोर्टिङ सिक्किम र नेपालका ६ टोली सहभागी भएका थिए ।