महिला टी–२० क्रिक्रेटमा भारतको दून हेरिटेज विजयी

झापा । भद्रपुरको मेची बहुमुखी क्याम्पसको क्रिकेट मैदानमा बुधबारदेखि नेपाल–भारत मैत्रीपूर्ण महिला टी–२० क्रिक्रेट प्रतियोगिता सुरु भएको छ ।

नेपाल–भारतमैत्री सङ्घ कोशी प्रदेश समितिको आयोजनामा भएको प्रतियोगिताको पहिलो खेल नेपालको मिलन क्रिकेट क्लब झापा र भारतको दून हेरिटेज सिलिगुडीबीच भएको थियो । जसमा दून हेरिटेज सिलिगुडी विजयी भएको छ ।

टस जितेर पहिलो ब्याटिङ रोजेको सिलिगुडीले मौसमका कारण १२ ओभरमा सीमित गरिएको खेलमा ४ विकेट गुमाउँदै ६४ रनको मध्यम योगफल तयार गरेको थियो । त्यसमा ह्याप्पी सरकारले ३८ रनको योगदान गरेकी थिइन् । जवाफमा मिलन क्रिकेट क्लबले निर्धारित ८ विकेट गुमाउँदै ५३ रन मात्र बनायो ।

विजयी टोलीबाट सर्वाधिक रन बनाउने ह्याप्पी सरकारले खेलको म्यान अफ द म्याचको पुरस्कार पाएकी थिइन् । बिहीबार भारतको अर्को टोली अल्पाइन स्पोर्टिङ क्लब सिक्किम र आजको विजेता सिलिगुडीबीच हुनेछ । फाइनल खेल शनिबार हुने जनाइएको छ ।

क्रिक्रेटको माध्यमबाट नेपाल–भारतका महिला क्रिकेट खेलाडीलाई परिचित गराउने र आपसी सम्बन्धलाई प्रगाढ बनाउने उद्देश्यले पहिलो पटक मैत्रीपूर्ण प्रतियोगिता आयोजना गरिएको नेपाल–भारत मैत्री सङ्घ झापा अध्यक्ष प्रदीपमणि रेग्मीले बताए ।